上星期五本欄講一位讀者大罵快活谷馬場嘅跑道偏差，賭馬變咗賭檔位，侮辱智慧，所以戒賭，改為賭波。
一位叫做SirLi嘅讀者傳來電郵，駁斥上述講法，若因檔位偏差而戒賭，係不合情理，因為（一）若買檔位而收錢，何樂而不為？（二）董驃講過內檔有利，何須大驚小怪？（三）曾經每逢快活谷用C+3跑道，老馮買一至六檔串Q（十五注），結果輸錢收場（即證明唔係如想像中那般有利）。
SirLi引述一個例子（出自「機會的數字」，牛頓出版公司，頁一六六至一七○）：「工廠在一段時間錄到十五次生產事故，早、晚班各六次，中班三次。這數據令人懷疑中班比較安全。但數據沒有足夠的支持。」
目前跑道偏差之說，就有如上述，係冇經過認真研究而產生嘅印象。照計馬會人財兼備，人才濟濟，或可搵專人做一個嚴肅嘅統計考證，做足regressiontest，令馬迷、評馬人釋懷。統計數字唔會說謊，但錯誤了解銓釋數字就會產生說謊嘅印象。
解釋跑馬數據已經咁複雜，做民意調查更加容易勞氣，譬如港大鍾庭耀接生意做大學排名調查，用民意調查嘅方法，令嶺南大學副校長饒美蛟教授（本身係經濟學?管理學專家）大為不滿。學術性討論本來好平常，但在今時今日嘅香港，政治掛帥，鍾庭耀呢位「擁董派」眼中釘，好快就因此俾一啲有心人乘機攻擊，饒教授大概亦估唔到自己篇討論文章會俾人利用也。