麻雀耍樂歷久不衰，四年前一隻PC版《明星三缺一》賣到周街斷貨，機舖亦點都要擺番幾部看門口。好多人都話自己高章到贏硬電腦，對人戰又如何？《麻雀格鬥俱樂部》系列就睇中網上連線特色，將港、日、台串起鬥一番，更設下段位級數排名系統，等一眾雀友埋身「牙骨介戰」，卒之成功吸引三地超過170萬人開卡做會員，日爭夜爭就係為咗攞最高榮譽嘅黃龍稱號！
記者、攝影：徐影龍
ImageGirl：Fion
鳴謝：KONAMI（HK）、無線遊戲機中心
第一代《麻雀格鬥俱樂部》其實並未支援Online對打，到香港遲年幾到貨後，已改為可Online嘅1.5版本，一推出就食正港人對麻雀嘅熱情，紛紛開卡加入戰團，跟日本、台灣人拼個你死我活。到近日第三代開始喺全港4間機舖進行地方測試（LocationTest），一眾Fans再度活躍，齊齊為打入黃龍榜而奮戰。
《麻》好玩地方，唔止打麻雀贏點數棒咁簡單，最正係其升級設計，由初初開卡時嘅十級會員，慢慢升到一級，再進化成四聖獸而戰鬥，個個全力以赴、做到最好，為嘅係對方手上「格鬥珠」，奪取若干數量格鬥珠後，便可晉級成四聖獸Master，再去就係至高榮譽嘅黃龍級，呢個稱號喺100個玩家入面都未必出現一個，實在相當之罕有。再升就係全國戰頭300位嘅黃龍Ranker，甚至只得日本先有嘅黃龍王！
日本已正式推出第三代，雖然仍未有大貨到港，不過目前已有四間機舖進行LocationTest，就算舊有玩家拎住張一代卡，都仍可讀取舊有段位，以及記錄三代新模式嘅資料，雀友大可玩住一代升級先，到全港四十幾間機舖換入三代底板後，就可幫張卡Upgrade，正式投入三代嘅世界。
1.無線：沙田中心3樓22號店
2.沙龍：沙田瀝源街沙田娛樂城G/F
3.創聲：中環域多利皇后街15-16號地下
4.北京道：尖沙嘴北京道65-69號B/F
據香港負責KONAMI街機事務嘅Edison所講，除遊戲介面稍有不同外，第三代基本玩法不變，包括保留全國大賽嘅段位認定，大家仍可繼續以黃龍稱號為目標，不過就加入兩大新玩法，其中最剌激要算係「半莊戰」，雖然要用3個Credit，不過就打足兩圈，較不同係第四位要奉獻兩粒格鬥珠畀頭位，而第三位則輸一粒畀第二位，而且不定時出現嘅「×2」、「總取」附加效果，令珠數喺一局內上落可以超過10粒！比舊版得頭位同包尾先有一粒珠交收，好玩得多。
另一新玩法就係OnlineTourment，簡單啲講係另一級數認定，要喺12分鐘內攞頭位，就可進升下一局，好似武術大會淘汰賽咁玩，為嘅係奪取最高階嘅A1段位！
好多港人打慣廣東牌或台灣牌，唔多明日本牌打法，搞到玩《麻雀格鬥俱樂部》時唔明點解自摸一番都唔食得胡，搞到敗興而回。其實日本牌雖然有好多屬有番數嘅牌，如旺子、一盃口、平胡等，要食咗胡先加落去，即係起碼要有一番底先算數，最簡單方法就係打門前清，呢點亦係打日本牌嘅重要技巧之一，正所謂「運氣只一時，技術要保持」！
要達成黃龍級，升級路途十分之漫長，所需格鬥珠為數實在唔少，所以做得黃龍，除運氣輔助外，真正攻守技巧亦肯定相當到家。今日就分別搵同屬黃龍級嘅雀王同雀后，發表吓高手心得。
經驗：對戰超過4,500局
黃龍珠數：93粒
之前已經好鍾意玩世嘉隻《MJ》，後來發覺香港入咗部可Online嘅《麻雀格鬥俱樂部》，即時挑起我打低日本仔嘅癮頭，跟住就日打夜打努力升級，到今日重上埋黃龍珠數榜首口忝。講到技巧，基本打法如睇牌路、值博率等當然唔少得，其他留意地方就係以「穩」為重，第一代只打一圈好難追番，不過去到第三代打足兩圈嘅「半莊」，就不妨進取啲，尤其遇着「×2」、「總取」等附加效果時，個個爭食胡，穩守只會坐以待斃，我就試過一局攞盡12粒黃龍珠！雖然我以白虎屬性（進攻型）升到黃龍，不過個人始終推薦青龍屬性（好運型），因為食出役滿牌機會較大，可算一鋪定江山。
經驗：對戰超過3,000局
黃龍珠數：45粒
至於心得，當然係昅住點數棒嚟玩，要靈活運用四家點數差距嚟打牌，例如你排頭位，博牌就寧願揀尾家要嘅「危險章」，點都唔好博第二位要嘅牌。另外每鋪開始，你要學懂電腦要你做咩牌，順住牌路去做，千祈唔好勉強做大牌。
喺度再教大家一個Master升黃龍嘅簡單方法，就係連勝三場呢個條件，唔一定要Online贏人先算數，我係第一個發現店內戰連勝三局都升到黃龍，所以約埋三五知己打店內戰嘅話，想連贏幾多局都得喇！
PROFILE
出卡費用：$10至$12
連線對戰：每局2至3Credit（每Credit$5）
(C)20022004KONAMI