由柴崎幸主演嘅恐怖片《鬼來電》，早排非常好彩，電影除咗喺日本一開畫即橫掃票房外，重獲得荷李活片商垂青，準備開拍荷李活版，安排英美十多個國家上映，認真威水。
《鬼》片同幾年前《午夜凶鈴》有唔少相似處，好似係用電話做嚇人武器，亦有一幕厲鬼喺柴崎幸頭頂爬出嚟，似足《午》片貞子喺電視爬出嚟咁，不過橋唔怕舊，最緊要受，嚇到人就得啦！
講番《鬼來電》部片，內容係講述柴崎幸飾演嘅大學女生由美，驚聞好友慘死，原來佢哋都喺死前三日，收到猛鬼手機留言，而發訊人竟然係死者自己！後來由美都好唔好彩咁收到死亡口訊，但佢獲得由堤真一扮演嘅神秘男子山下冒死破解厄運。
電影喺日本上映嗰陣，因為電視宣傳片太恐怖，曾收逾百觀眾投訴，搞到電影公司要再重新製作過個廣告。
聽聞拍攝現場亦有鬧鬼疑雲，堤真一第一次喺拍戲中感到不適，後來有位和尚同佢講，話有五個靈體喺佢身後。另一位演員吹石一惠都覺得好邪，因為有一場戲要求佢喊，佢竟然唔知點解喊到收唔到聲。