馮仁昭四圍超：
林海峰拜師扮機械王菲　Hit

康城影展裏面由王家衛執導嘅《2046》近日成為咗熱門話題，林海峰（Jan）有見及此，所以決定喺最近一集《有線娛樂乜人台》度以《2046》為主題，而且佢重諗住親身扮演王菲喺電影入面嘅機械人造型㖭。
為咗扮得更神似，林海峰日前就向曾經到外國進修扮機械人嘅時裝設計師陳刀學藝，學佢扮機械人嘅技巧，阿Jan當日喺陳刀短短十幾分鐘嘅教導後已經扮得有板有眼。

唔怕有比較
阿Jan話喺有線做節目主持係一個大挑戰，因為佢每集都要構思唔同主題，佢話：「我一定要搵一啲嗰排最hit嘅話題，咁啲觀眾先至有共鳴，而且自由度好大，同我以往主持嘅節目好大分別，唔會有太多限制。」
不過，阿Jan就對之前幾集嘅節目唔係太滿意，問佢驚唔驚觀眾會將𠵱家個節目同多年前嘅《軟硬製造》做比較，佢就話：「咪由得佢比囉，當年睇《軟硬製造》啲人𠵱家都幾十歲，總之我會用有限嘅資源去做好件事。」
場地提供：陳刀時裝

陳奕迅患產前恐懼症
陳奕迅早前接受商台嘅訪問，佢話知道就快做爹哋之後，成日就會諗啲天馬行空嘅嘢，即刻就被主持人查小欣笑佢有爸爸產前恐懼症，而陳奕迅嚟緊六月底就會約滿英皇，但佢仍未決定去向，就算係定咗佢都希望工作時間會分配好啲，佢又話呢兩三年過得好精采，因為先後發生咗下體受創、爹哋入獄同太太有喜等等。

戴夢夢自稱錄歌撞邪
戴夢夢噚日喺新城娛樂台接受訪問，順道宣傳新歌《白日夢之戀》，原來《白日夢之戀》個歌名係戴夢夢自己改嘅，佢話喺錄音時曾發現有怪聲，但喺換過個錄音室錄音之後，啲怪聲就消失咗，即刻冇事，所以最後都可以順利完成錄音，佢就話唔通係撞邪？

車婉婉眼紅紅送別公公
早前車婉婉個阿媽車綺芬入獄，後來佢知道阿爸去咗，就諗住擔保外出奔喪，點知最後申請唔批，咁身為外孫女嘅車婉婉，就代替母親盡孝，送公公最後一程。車婉婉公公車錦噚日下晏三點喺沙田寶福山出殯，享年八十七歲，車婉婉喺喪禮度雙眼紅晒好似喊過咁，最後佢哋送公公嘅遺體到火化場火化。

許冠傑開騷炒冷飯贈興
自從歌神許冠傑宣布下月開個唱，即刻引起「歌神熱潮」。喺佢未正式公開表演之前，exTV會喺下月七日，播番歌神喺一九八○嗰陣拍嘅音樂特輯，而喺同月十三同二十日重會播埋《許冠傑好歌醉人夜》。至於佢嘅告別演唱會，將會喺七月播出，相信佢嘅歌迷一定會坐定定喺電視前面睇番歌神嘅表演。

at17做藍色義工
做咗「關懷愛滋」義工多年嘅黃耀明，今個禮拜五將會同好拍檔at17喺灣仔為由護膚品牌Kiehl's舉行嘅「TheBlueParty」作慈善演唱，同場重會有另一隊女子組合Mesy表演㖭。當晚明哥同at17重會着住特別為呢個活動而設計嘅藍色服裝。