王家衞與《2046》一眾演員，日前未有出席康城頒獎禮，亦沒有捧應屆影后張曼玉場，結果遭商台主持查小欣批評沒有體育精神。不過黃秋生暗指她的說法惟恐天下不亂，對於梁朝偉不甘心輸給日籍童星柳樂優彌，秋生則指小孩與狗都是大忌，因為遇到他們必輸無疑。
查小欣昨日主持商台節目期間，公開批評日前王家衞與一班《2046》演員缺席康城頒獎禮，她說：「你知道其中一個攞獎嘅係香港人，嗰個係張曼玉，雖然佢攞獎嘅係一套法國戲，但係佢都係一個香港演員，咁都去撐吓場啦！喺外國人眼中，你班香港人自己都唔去支持自己，自己友攞獎都唔嚟；第二，覺得你班人好鬼冇體育精神，有獎你就嚟，行紅地氈你就嚟，冇獎你就唔嚟，掉返轉頭諗，《2046》有獎，其他冇獎攞嘅唔嚟，場面冷清清又點呢？」
查小欣又說：「我又企返嚟王家衞嗰邊，好難得《2046》一班演員齊集康城，咁就爭取一時得一時。係，等人哋覺得呢班人有體育精神緊要啲呀，定係食餐飯緊要啲？當然係你哋嘅選擇。當然喺我哋嚟講，你係咪都去，去完個頒獎禮先食飯得唔得呀？餓唔死㗎啫！」
十四歲日籍演員柳樂優彌奪得康城影帝後，梁朝偉前日公開質疑「小朋友有乜嘢演技」，與梁朝偉甚為老友、並曾替《2046》試造型但未有參演的黃秋生，昨日接受本報電話訪問時說：「比賽實有贏有輸，我就冇乜感覺，拍戲不嬲最忌就係小孩與狗，因為佢哋一定搶你鏡，實唔夠佢哋做，佢哋直覺又強，根本唔需要演，因為根本就係，天生就咁，所以好自然實輸，好似《一碌蔗》嘅細路咁，冇得比。」
對於有電台主持抨擊《2046》眾演員沒有出席頒獎禮祝賀張曼玉奪得影后，黃秋生說：「撐乜嘢場啫，唔去實有原因㗎，唔好自己諗有仇或者唔妥，唔好成日有被迫害妄想症，你點知人哋冇打電話祝賀？點知冇約埋第日慶祝？嗰啲主持惟恐天下不亂，講少句啦！點解要咁心胸狹窄？唔通全香港唔使開工嘅都飛過去撐場，咁先叫做支持？」
