地產商餓地好耐，賣地成績出奇咁好，唔計兩幅地嘅底價，單係市場預期條數，成交價都超出近50%。噚日個股市本來跌緊（曾經跌過146點），但賣地競投激烈且造到好價嘅消息入市後，市勢即由低位回升，結果以接近全日高位收市，恒指升29點，但期指就轉番低水。
馬鞍山地皮由長實（001）投到，沙田地皮就由嘉華國際（173）奪得。長實好少喺賣地場合投地，今次出馬，且搶到個價咁高，顯示對地產後市有無比信心。其實，噚日除浮面嘅南豐、新世界（017）同嘉華外，唔少大地產商都用橫手競投，唔露真相，無非唔想「必」到個價太高而已。馬鞍山地皮每呎成本地價連建築費接近4000元，3年後落成，估計售價約5000元，比現時同區的2手樓價3300至4000元，高出25%至50%。噚日賣地後，多區2手樓價已即時升5%至10%。
以往賣地，市場若果預期成績唔錯，地產股都會升定先，而每次賣完地，即使成交價同預期相若，投資者多會趁好消息出貨，地產股價會即時回落。不過，噚日賣地成績實在係太好，刺激地產股價繼續上升，長實（001）更由低位55.25元抽上57.25元收市，升一個位；新地（016）亦由61.50的低位反彈上63.75元，倒升1.0元；新世界反彈力度最勁，由5.55元搶到上6.0元，收5.9元，升2.6%。
經噚日賣地出現指標價後，樓市已確認轉勢，估計今年內，樓價在現水平會再有10%至20%的升幅，特別係過去半年升幅未能跟上豪宅的中小型單位，升勢會更為有力。
市場曾擔心加息周期開始會對樓市不利，但由於未來幾年住宅單位供不應求，即使息口上升（估計1年內加息1.5厘至2.0厘），亦唔會對買家強烈的置業意欲有太大影響，樓價仍會持續上升，目前買樓收租回報有3至4厘，仍可吸引本地和外來的投資者入市。
樓市向好，現時已大幅調整的地產股，正好趁低吸入，瑞銀便預期今年底地產股價會上升40%至50%，綜合各大行預測，新地目標價90元，長實75.0元、恒地（012）可見5字頭。
郭兆誠