國企指數成份股，又有幾件醒神，帶動指數上升嘅有中石油（857）、中石化（386）、國壽（2628）、人保（2328）等。總之日日有幾隻養眼嘢，國企指數就繼續攀升，揸中企Call輪有着數。
好多中企Call輪嘅溢價已經相當高，炒兩三日唔使太計較，至緊要就睇住成交量做嘢，不過想賭得安心，最好都係揀啲低溢價輪埋手，對象有9363同9984。9363下月到期，輪價15仙，溢價5.6%，槓桿率11.9倍，炒呢件要留意時日無多，溢價會一日低過一日。9984十一月到期，輪價20仙，溢價8.2%，槓桿率4.8倍，呢件日子長，唔怕溢價縮得快，美中不足嘅係槓桿率細咗啲。
是日龍虎榜上，有件港燈Call輪9838，埋單價16.9仙，尾市三下五落二做20萬份（價值3萬4銀），咁就造成40.8%升幅，龍虎榜上排第2。正股（006）冇升到，反跌20仙，收31.50元。9838嘅升勢，可謂唔通，11月到期，溢價10.1%，槓桿率18.6倍。如果正股係有波幅、有彈跳力嘅，則溢價逾10%都冇所謂，但正股係成日牛皮嘅股份，隻輪嘅數據就唔多啱數。
港燈有隻短期Call輪9617，輪價18.4仙，溢價1.1%，槓桿率17.1倍，數據好正，可惜下月中到期，正股若然牛落去，揸隻輪亦都冇乜着數。
章盛