實在太耐冇賣地，發展商都「餓到暈」，政府噚日拍第一幅馬鞍山地，發展商如狼似虎，舉牌此起彼落，搞到經驗老到嘅外籍拍賣官，開頭都嗌到氣咳兼甩轆。
雖則話兩塊地都由嘉華勾出，但承第一口價嘅反而係南豐，而華置大細劉就兄弟同心，一齊出席，可惜空手而回。老大哥長實同新地，明顯好整以暇，採取混淆視聽手法，搵高層人員，全程喺背後遙控生面口代表舉牌，所以好多時都見到長實小超喺咁激烈場面下，閉目托下巴養神，唔知呢個動作係咪暗號呢。
講番勾地嘅嘉華，差啲為人作嫁衣，雖然搵咗老拍檔信和幫手，點知都攞唔到馬鞍山塊地，第二幅地爭到一半，老友信和棄權，嘉華惟有孤身作戰到底，最後得償所願，但將來有冇錢賺就好難講了。
攝影：凌樹輝、黃建通
賣地成績理想，超過市場預期好多，二手樓市即時有反應，梗係封盤加價啦！
但係，有啲喺賣地前沽出單位嘅業主，𠵱家就可能後悔緊賣早咗。
馬鞍山嘉華星濤灣，啱啱有一單低價蝕讓。利嘉閣黃溢霖話，由於較早時樓市氣氛轉弱，呢個投資者為咗唔想上身，於是沽貨離場，以低同類造價五個巴仙，即二百一十六萬，賣出一座極低層C室，七二二呎，呎價近三千，蝕九萬。
睇番噚日賣出嘅馬鞍山地皮，樓面呎價已經要二千七百七十三蚊，起好成本要成四千蚊呎，唔知個投資者有乜感想呢？
唔少買家喺賣地前夕偷步買新盤，好似馬灣珀麗灣三期，一次過賣出兩間珀麗二重天特色單位。
利嘉閣執行董事廖偉強話，玩具城鄭氏兄弟，噚日賣地前買入二十座頂層E室，一二三零呎，成交價逾千一萬，每呎近九千四，暫時係成個盤最高。鄭氏兄弟重打算買多幾間，真係算得上新一代地產大好友。
另外一個喺前晚漏夜成交，中原助理區域經理程尚傑話，二十座頂層H室一二三零呎，成交價千一萬，呎價九千，買家重係追價百幾萬，發展商先肯賣。
馬灣珀麗灣三期，估計係賣地後首個推出大型住宅盤，揸fit人新地代理執行董事雷霆，呢排日日見傳媒，催谷宣傳。
由於樓盤會搵代理幫手賣，涉及佣金唔少嘢，代理梗係唔想個盤衰，自然落力協助造勢。
美聯除咗喺荃灣西「珀麗灣展銷廳」，成立兩個專隊外，重推出「頭等內購服務」，為內購買家提供一條龍服務，派出員工，前往買家屋企，幫佢哋辦理內部認購手續，將樓書送到個客屋企，同埋用手機發放珀麗灣三期最新樓盤資料畀客。
美聯又製作「珀麗灣三期」專輯，包括珀麗二重天，同GreenGreenClub景觀、交通、教育等資料，送畀內部認購客做紀念。
代理花盡心思，務求做多啲生意。
薄扶林貝沙灣價錢愈賣愈高，成功將個價推到去成萬蚊一呎，搞到同區舊樓大業主都想重建物業，趁勢撈番一筆。
話說最近城規會審理單案，申請人係薄扶林道126號多福大廈業主，想將物業重建做二十三層高，四十個單位住宅，同一幢三層會所兼停車場。蘭西在好奇心驅使下，去查吓業主係乜水。
吓！原來來頭唔細，就係九巴四大家族之一余道生家族。呢個家族向來低調，但如果話畀你知，家族後人之一，係迪生創建主席潘迪生太太余桂珠，相信好多人都會「哦」一聲。
余道生二三十年代靠買賣黃金發達，家族幾有錢冇人知，不過，淨計喺香港嘅財產，已經有二十幾億，收租物業，主要喺中西環同半山，其中皇后大道中三十七號余道生行，可謂家族象徵物業。
講番呢幢多福大廈，喺六二年入伙，樓高十二層，二十四個單位，面積為千四同千九呎，𠵱家租咗超過七成，月租萬八同二萬七。
蘭西
電郵地址：
