國家真係好睇香港，屍爬自由行，借完楊利偉，連滿天神佛都出埋，今次由一啲親中傳媒出面，請到一截佛指，嚟到特區擺設。
講到呢截嘢就真係巴閉，係佛祖釋迦牟尼生前嘅靈體，流傳二千幾年，藏於陝西法門寺。有一段日子埋藏地下，「文革」時代有班紅衞兵走去破壞，點知一名老僧，挺身自焚護靈體，嚇走咗班紅衞兵，佛指得以保留。
為隆重其事，今次有一大班護僧、住持，勁大陣仗，舞龍舞獅，高宣佛號，準備恭請佛指，請呢截金手指指明吓方向，睇吓下一步應該點行。
果然香港噚日當堂轉咗地運，賣地賣個滿堂紅。
之不過，佛教最反對一樣嘢，叫做「偶像崇拜」。佛祖生前話，身體器官，只係一具臭皮囊，毫無意義。人人都可成佛，既無所謂偶像，亦冇所謂佛指、佛牙、佛腳趾、佛毛，當正好似法國名畫咁，價值四五十億，包機嚟香港展出，咁樣做，有違佛經教義，佛祖有知，可能佛都有火。
𠵱家無喇喇將一截佛指政治化，好似當年「文革」時代阿毛頭澤東，送出一籃芒果畀啲工廠，全國人民，將籃芒果當做「聖芒」，排隊參拜，一路讀毛語錄，一路對住幾隻乾芒果眼定定。嗰陣時，邊個夠膽走埋去摸吓隻芒果，邊個就係反革命，隨時打靶，呢鋪崇拜偶像兼戀物嘅慣性，幾十年都冇得戒。
一級國寶運抵香港，唔少信眾都專誠沐浴更衣，諗住去瞻望吓呢件佛教聖物，就連示威常客女長毛都收服埋。
八歲就經已信佛嘅女長毛，為咗呢件本地佛門盛事，寧願唔向在場嘅全國政協副主席、中央統戰部部長劉延東示威，以平靜嘅心境參加呢個盛會。
但女長毛前日先喺會展向政務司司長曾蔭權示過威，噚日一入到會展，就俾保安員警告，話佢知今日劉延東會嚟，叫佢唔好亂叫，重話今次真係唔講得笑咁話。
女長毛卒之聽聽話話咁參加成個典禮，佢重話希望阿董作為特首，做人應該祥和啲，希望佛祖畀佢多啲智慧，等佢老人家識得喺三大名嘴封咪之際，會出嚟講番啲安定人心嘅說話。
阿董唔知會唔會醒水識做？
（圖）國寶佛指舍利嘅吸引力非同小可，市民四圍撲飛去參觀。
傳真︰2623-9278
電郵︰