同樣係大陸燃氣股，際遇就各有不同，華燊燃氣（8035）除咗被證監抽秤盤數有冇作假外，老總因被調查要辭職，可能有排未復得牌。但新奧燃氣（2688）不但成功向世界銀行旗下的國際金融公司借錢，更獲後者以溢價買入2.71%股份，認真同人唔同命。
新奧自從有人睇起後，股價表現當堂唔同晒，噚日又升2.3%，收3.375元，高過國際金融公司每股3.31元的入股價。有個猛人做策略性股東，後市似乎可睇高一線。
另外，市況稍為好番啲，經紀陳又向小初推介高風險細價股，就係在去年7月上市時，曾有匿名信事件嘅展鴻控股（572），佢話隻股最近獲得大戶睇起，稍後將有一連串推介活動。
展鴻去年7月，以每股1.23元上市，由於受匿名信所累，股價從未好過，一直處於潛水狀態。
自從展鴻4月初公布全年業績後，PE計落只得3.4倍，兼夾有末期息3.8仙派。睇落相當吸引，所以有大戶垂青。
慕容小初