無驚無險，個市再升86點。今日賣地，噚日冇偷步大升係好事，唔怕賣完地之後借消息出貨，個市回番落去。
3隻內地電訊股，中移動（941）只升0.70%，移動得最慢。不妨諗諗相關Call輪玩短線，對象係9813同9985。9813輪價21仙，12月初到期，溢價8.4%，槓桿率10.1倍；9985喺11月到期，輪價21.7仙，溢價8.4%，槓桿率9.8倍。中移動4月底用戶總數1.53億戶，較對上一個月增加2%，數據唔錯，始終會有刺激。
中電信（728）上禮拜以每股2.30元做披成後，曾經連披成價都守唔住，是日收2.375元，升7.5仙。披成影響過後，有望逐步爬番高啲，細細注執啲Call輪，對象係9899，7月到期，輪價52仙，溢價1.1%，槓桿率4.6倍，爆炸力係弱些少，但勝在溢價低。其他Call輪溢價高到買唔落手。
航空股掂檔，中信泰富（267）得益。搵中信Call輪炒，揀9139，10月到期，輪價35仙，溢價3.7%，槓桿率5.2倍。
太A（019）亦有航空股成份，收48.50元，升1.5%。鎖定回報Call輪9176，短線睇好，收13.1仙，升13%，有19球易手，明年3月至到期，短炒嘅話，數據唔使太過理會。
國企電力股郁得有形，可諗吓華能Call輪9257，10月到期，輪價32仙，溢價7%，槓桿率4.4倍。
章盛