英格蘭球員一向鍾意同報紙寫專欄，因既能搵外快，又可以令廣大球迷知道多啲佢哋嘅嘢。不過，喺今屆歐洲國家盃決賽周期間，所有英格蘭國腳都暫時唔會寫專欄住；因為佢哋話想專心踢好今屆國家盃，爭取自六六年世界盃以來，首項大型足球賽事嘅錦標。
呢個意見係由英格蘭國家隊隊長碧咸提議，獲領隊艾歷臣大力支持。不過，雖然全部英格蘭球員最後都同意咁做，但據悉當中有唔少國腳唔係咁滿意，好似前鋒奧雲同後衞泰利咁，佢哋已經同某報紙簽咗約，𠵱家突然唔寫得專欄，佢哋覺得好唔好意思。重有啲不願透露姓名嘅英格蘭國腳暗寸碧咸同艾歷臣，話唔知佢哋係咪因為之前嘅私生活被報章大肆報道，所以先諗出咁做。
嘩！今次英格蘭呢招唔同報紙寫專欄，係咪叫做未見其利、先見其害呢？
講開歐洲國家盃，每逢呢啲大賽，英國網頁都興搵球星老婆或者女友嘅相放喺網頁上，叫球迷投票選乜乜物物小姐；不過，唔知係咪呢類選舉出現得太多，網頁開始有啲求其，好似football365搞嘅04歐洲國家盃小姐選舉中，俄羅斯同捷克代表都係同足球冇乜關係，好夾硬嚟。
本屆西甲聯周日結束，其中踢歐冠盃嘅切爾達最後無法避過降班厄運，下屆要喺乙組角逐。切爾達今次降班，連累埋預備組，因切爾達預備組目前打緊丙組升班附加賽，有望升上乙組，但由於西班牙聯賽會規定一間球會唔可以有兩支球隊同組別競逐，切爾達預備組惟有被犧牲啦！
本屆英超聯已經完咗成個禮拜，不過冠軍阿仙奴嘅獎項重陸續有嚟，「兵工廠」同埋佢哋嘅球迷，分別奪得本屆英超聯最有體育精神球隊及最有體育精神球迷獎，為球會合共帶嚟五萬鎊（約九十萬港元）嘅獎金。另外，阿仙奴前鋒亨利亦以三十個聯賽入球，奪得今屆「金靴獎」㖭！
溜馬嘅米拿上場對活塞臨尾射入「致命三分」，顯示佢寶刀未老之餘；就連美國男籃都想召佢入隊打雅典奧運，而米拿話會考慮。我求大俠唔係質疑呢個老黃忠嘅實力，不過米拿上次打○二年世錦賽已試過受傷，家吓成三十八歲，假如唔係啲球星個個都話唔得，都唔使請佢出山。