台灣出版家沈登恩肺癌逝世，得年未夠六十。沈登恩喺台灣戒嚴期屬於「反斗出版人」嗰類，第一個將金庸武俠小說引入台灣。國民政府防共、禁止《射雕英雄傳》書名，因為原句來自毛匪澤東嘅詩詞「成吉思汗，只識彎弓射大雕」，搞到幾乎拉人封艇，後經沈登恩交涉，改名《大漠英雄傳》過關。
沈登恩做出版鍾意親力親為，因此積勞成疾，定於六月三日台灣大殮，佢未亡人話，沈生喺香港多知識分子朋友，佢泉下有知，都唔想阻大家出席六四維園燭光會，去台灣鞠完躬第朝飛返香港再祭六四英靈，時間啱啱好。
沈登恩逝世，由信報某專欄最早披露，點知《亞洲周刊》扮醒目，話沈登恩「依然健在」，重嘲笑信報老闆林行止靠害老友（因為沈登恩同林行止出版過言論集），聲稱事件「澄清」之後，林老闆「頗感尷尬」。結果尷尬嘅梗係變咗《亞洲周刊》喇。傳媒人興互踩，皆因有啲酸溜溜嘅文人對成功者眼紅，如大班毓民封咪，最落井下石嘅就係一小撮親中文人，自己窮，就諗計自我增值喇，文人相輕又踩錯晒界，自己老土，又何必呢。
傳真︰2623-9278
電郵︰