中原兩個創辦人，施永青同王文彥，都好鍾意寫嘢，上中原網頁可以睇到佢哋嘅文章，唔知係咪潛移默化，高層都熱衷寫稿。
繼中原地產董事總經理黃偉雄，將QuamTV中「Adday會客室」十五個專訪輯成「友言集」後，董事一姐劉瑛琳著作「地產樓聲璣」就快面世。
聽一姐講，本書會分四部份：優質生活、投資攻略、市道經緯與地產管理心得，除咗中原網頁「樓聲璣」嘅文章外，最後一部份重係全新未曝過光。本書重搵到新地蘇仲強、九倉黃光耀及永泰亞洲李簡鳳玲寫序。
先印一千至千五本，預計下月底有得賣，每本盛惠五十皮。不過，已經有唔少人預定。女
代理主攻住宅，近幾個月不停開分行，商業部都唔執輸，美聯喺金鐘海富中心商業部旗艦店，噚日開舖。
美聯營業董事黃漢成話，新寫字樓佔地六千呎，比之前足足大一倍，營運費用都多一倍，好似廣告宣傳等，每個月要成四十幾萬。佢重話，會搞埋電子化，及增聘人手，預計年底前會超過一百三十人。
寫字樓一向有唔少投資者入市，佢哋噚日都有到賀，好似近排曝光率甚高嘅黎汝遠，噚日上晝去賀中原開分行，下晝去祝美聯分行開張。另一名係好少出席公開場合，寶昇煙花麥氏家族成員。
前粵海企業為債權人沒收一批逾三十項物業，債權人委託仲量聯行，逐步放售，經過三年時間，終於全數沽清，合共套現十億零四千萬。
仲量聯行投資部主管盧慶雄話，該批物業買家，除投資者與用家外，重有上市公司，好似新鴻基地產、恒基地產、嘉里建設及順豪資源等。
仲記今次睇怕收佣都收到手軟啦！
呢排樓市氣氛雖然冇咁好，但係招標出售物業，真係多到數唔晒，各類物業都有。其中永義國際長沙灣永義廣場，委託第一太平戴維斯標售，六月三十日截標。
永義廣場佔地六千一呎，屬工辦物業，九八年落成，二十七層高，共七萬四千五呎，九成樓面租出，月租七十萬。市場估計，市值億五。
永義國際近年不斷供股，供到出晒名，今次若果可以成功賣出永義廣場，唔知係咪可以多一條「錢途」呢？
私人住宅早幾年已經過百萬，但差餉物業估價署最新公布，02年竟然只得九十八萬，減少七萬六，約七點二個巴仙。
原來計算方法唔同，01年計埋村屋，02年起唔計。
不過，舊年條數終於過番一百萬，可見舊年市場吸納量都唔錯。
差餉物業估價署嘅資料數據都幾完善，不時都有新嘢推出，若果第日連村屋都做埋表畀大家睇，咁大家對樓市就可以有一個較全面嘅印象嘞。
蘭西
電郵地址：
