由梁朝偉主演的《2046》在康城影展全軍盡墨，他直言對今次未能封帝感到十分失望，又質疑年僅十四歲的日本影帝是否具真材實料。偉仔昨返港時一反常態地說：「輸畀個小朋友，小朋友有乜嘢演技呀？我嘅演技未至於出神入化，但算係爐火純青吖。」
王家衞執導的《2046》成為今屆康城影展唯一一齣入圍參選的華語電影，可惜該片大熱倒灶，而專程到法國出席影展的《2046》台前幕後人員，日前全部缺席頒獎禮。昨晨約八時偉仔與王家衞返抵香港，而嘉玲則在抵港後轉機飛往上海拍劇，當偉仔被記者拉着訪問時，王家衞即從另一邊溜走。偉仔對今次敗給一名年僅十四歲的日本童星柳樂優彌直言心有不甘，還質疑對方的演技。
偉仔昨日坦言對落選感失望，他一反平日沉默寡言的個性說：「我覺得《2046》可以得金棕櫚獎，王家衞拍呢部戲好用心，台前幕後辛苦咗四年，𠵱家落敗，我真係好失望。最初我以為嗰套英國片（《TheLifeandDeathofPeterSellers》）嘅謝菲路殊（GeoffreyRush）先係勁敵，最後竟然輸畀個小朋友，小朋友有乜嘢演技呀？我嘅演技未至於出神入化，但算係爐火純青吖。」
對於外界指《2046》是《花樣年華》的延續，了無新意，偉仔表示不贊同，他說：「兩部戲係唔同嘅，更唔係《花樣年華》續集，只係王家衞續集，佢拍呢部戲壓力好大，但拍得好有水準，歐洲口碑幾好，其實都算有交代。攞唔到獎我認為同遲交片冇關係，只係因為唔係評審喜歡嘅素材，啲評審喜歡套紀錄片（《華氏9.11》）多啲，有時得獎都要靠天時地利人和，評審得嗰十個，冇辦法，但全世界記者都讚好，我覺得已經算係安慰。同時部戲可以參加咁大型嘅影展，咪當推動港片，等港片可以回復黃金期囉！」
對《2046》台前幕人員全體缺席康城頒獎禮，被指欠缺體育精神一事，偉仔不以為然地說：「大會慣例喺頒獎禮前夕通知大家賽果，咁都知冇獎重去嚟做乜？荷李活班候選人都走晒啦！得獎嗰啲喺晒度咪得囉！」
至於緋聞女友張曼玉（Maggie）成為康城首位華人影后，偉仔表示替Maggie感到開心，他又指Maggie的演技出神入化，早在《花》片時便應奪獎。偉仔又說：「噚晚我已經打電話恭喜咗佢，今朝一落機我都有再打畀佢，但搵佢唔到。」記者問他為何日前去看Maggie主演的《Clean》首映時要走後門，是否不想被女友嘉玲知道？偉仔否認說：「唔係，行後門係唔想喧賓奪主，嘉玲嗰晚要出席鞏俐嘅party，先至冇去睇Maggie部戲啫！咁咪由我做代表。」
提到巴黎戴高樂國際機場2E客運大樓發生塌頂意外，昨日亦是由該機場乘機返港的偉仔說：「我上機前已經知道，不過我唔係喺2E上機，所以冇乜影響。」
此外，劉德華昨日赴北京繼續拍攝馮小剛執導的《天下無賊》，他在機場被問到對偉仔落敗有何看法時說：「佢重有好多機會，唔使唔開心，《2046》部戲我係睇過，但究竟佢應唔應該得獎，我都唔知點講。偉仔已經演得好好，演活咗個六十年代嘅人物。」
曾志偉昨日則偕同兒子赴北京，他在機場被問到對《2046》落敗有何意見時，笑說：「《2046》係唔應該攞到獎，因為佢哋咁遲交片，的確對其他參賽者唔公平。」對於偉仔因敗給一名十四歲小朋友而感到不開心，志偉哈哈笑說：「吓？我好開心喎！因為Maggie封后。偉仔唔開心，人哋十四歲演番十四歲咪啱，你問番偉仔佢做唔做到十四歲嘅仔角色？」
採訪：陳烱威
