八方上周同市區重建局新主席鄭維新食晏，知道佢哋對灣仔利東街重建滿懷信心，重親自微服出巡，視察形勢，睇吓點樣可以四兩撥千斤，將來起間新大樓，專闢一層樓做番印喜帖生意，另一層做結婚用品。
八方問灣仔區議會主席黃英琦點睇？點知Ada好勞氣咁話，市建局只係識收樓重建，未有盡全力保留利東街特色，好似專做印製大紅喜帖嘅商舖，如果真係想人幾年後繼續做，就應該做好過度安排，喺附近搵舖位畀佢哋做住，將來舖換舖，先係上策，但係有關人士又話冇得傾，以前余志穩講靈活性唔知去晒邊。
黃英琦愈講愈覺得當局離譜，無充份照顧灣仔區嘅文化歷史，所以佢一定會同街坊出頭，幫手爭取。講兩講，Ada話區議會本來好想做兩者之間嘅橋樑，但係佢一月六日當上灣仔區議會新主席，市建局一月七日去信利東街收樓，又的確當新區議會冇到，唔怪得佢阿姐咁嬲。
傳真︰2623-9278
電郵︰