八方周末同幾位好親中愛國嘅朋友消夜，幾個圍埋，個個都話九月投民建聯票，跟住就破口大罵毓民大班，八方唔想講政治，就講張曼玉勇奪康城影后，大讚Maggie為港增光。
點知幾位愛國同胞一樣火滾。某甲拍枱鬧：「呢條衰女一上場，就話多謝佢個法國佬前夫，有冇搞錯？點解佢唔多謝祖國，唔多謝特區政府，冇咗國家咁強大嘅經濟實力，迫到全世界低頭，法國佬會畀個獎佢？畀嚿屎佢就真！」
乙就話：「係囉，好似王家衞咁，就愛國嘞。佢特登遲到，就係喺法國佬面前扮大牌，等啲鬼佬承認我國嘅地位，攞番個彩！」
丙就㩒熄支煙，加把口：「係呀，張曼玉攞咗個獎，重話希望香港人為佢自豪，分享佢嘅喜悅！佢得獎啫，關我哋十三億人民鬼事呀？楊利偉揸火箭升空嗰陣，又唔見佢咁風騷？」
甲就諗起咗一啲嘢，話：「係呀，鬼佬無喇喇，會封個獎畀你？你哋記唔記得嗰個高行健呀？聽講佢咪因為加入咗法輪功，反中叛國，咁奧斯卡咪頒咗個最佳寫作獎畀佢囉！可見呢啲鬼佬獎，有死錯人咩？」
乙又話：「係咯。我睇咗各大娛樂版，發現佢嗰套戲好反華。個古仔係講一個阿媽，染咗毒癮，後來戒毒，同前夫爭個仔嘅撫養權。咁係咩嘢意思？即係影射我哋祖國由英國佬手中收回香港，個阿媽染咗毒癮，即是話我哋國家幾十年行共產制，又搞文革呀咁，即是有如吸毒。一個吸過毒嘅阿媽，想領番個仔自己養？法國佬好毒呀真係！嗰個張曼玉連個劇本睇都唔睇，就同呢啲反中帝國主義勢力合作，唔怪得佢話要多謝人喇！」
跟住幾條友拍枱拍櫈，目露兇光，八方見狀，怕佢哋受刺激過度，真係叫一班維園阿伯去機場接張曼玉機，於是惟有詐肚痛提早告退，剩番佢幾個繼續滿口性器官，聲討出爐影后。
事後八方諗，個社會搞到咁分化，真係好唔健康。人哋張曼玉攞獎，都遭到咁多人開口謾辱，大班毓民受壓封咪，言論自由收窄，班親中佬又叫罵佢兩個，叫佢哋要出席立法會提出事實根據，若然係生命受威脅，搞到要逃亡海外，咁又點敢出頭指證某一類政治黑勢力？
豬肉誠大罵民主派搞「港獨」及「半獨立政治實體」，又唔見班老左叫佢提出事實根據？不如咁，若然豬肉誠肯提舉任何香港人有搞「港獨」嘅證據，包括購買軍火、籌組香港國國軍、發行香港共和國鈔票、向美國購買生豬白米等糧水嘅計劃等等。
相信為公平計，到時大班毓民一定會出席立法會作供嘅，係咪？
傳真︰2623-9278
電郵︰