白鴿黨前日協調參選名單，點知黃偉賢（花名Z）（圖）臨陣退縮，搞到大旗手李永達冇晒計，只好將新界西嘅參選名單押後再議。
Z忽然話唔選，達仔都好𢱑晒頭、唔明解。話說喺協調名單前一晚，達仔、Z以及兩位兄弟重一齊打四方城，其間黃偉賢談笑風生，絕冇異樣，之後Z將一叠CD同VCD還番畀達仔，佢封因個人理由不參加九月立法會選舉嘅信件就係夾喺CD中間，非常神秘。
達仔後來打鑼咁搵佢，始終無法接觸到，所以好多嘢都唔清唔楚，無從解釋，八方都嘗試call黃偉賢，到噚晚截稿時間佢都未覆。
達仔話，所以開始擔心Z，唔知佢發生乜嘢事唔敢見班兄弟，佢都希望黃偉賢見八方尋人文章後，可以第一時間打個電話畀佢，免佢掛心。
黃偉賢冇消息四十八個小時，八方差啲想去報警，好彩佢議員辦事處嘅同事話佢星期日下晝喺元朗樂思會派樂思米活動見到佢，當時察覺唔到佢會唔選，至於今次突變究竟同錢銀女人有冇關係，重係有待佢本人澄清。
傳真︰2623-9278
電郵︰