夢工場動畫《史力加2》，上星期三喺美國開畫第一日，已經打破咗票房紀錄。原來呢套片喺上星期三至前日上畫五日以來，又破多咗另外四個票房紀錄，就連夢工場嘅老闆都話估佢唔到。
根據夢工場發表嘅初步統計，由米克邁亞斯（MikeMyers）、金美侖戴雅絲（CameronDiaz）等明星配音嘅《史力加2》，喺上周三至前日收到約一億二千五百萬美元（約九億七千萬港元），成為史上周三至周日，五日收入最高嘅電影，打破咗去年十二月上映《魔戒三部曲：王者再臨》嘅紀錄。
而單計上周五至前日，《史力加2》收得一億零四百萬美元（約八億一千萬港元），單計周末票房係史上嘅第二位，僅次於《蜘蛛俠》。不過《史力加2》喺上周六單日就有四千五百萬美金（約三億五千萬港元），打破咗《蜘蛛俠》嘅紀錄，成為史上單日最高票房嘅電影。而且套戲重係首周最高票房嘅動畫，重要喺五日內就衝破一億美元大關，簡直係威到盡。
其實好多人都估計《史力加2》有力挑戰《海底奇兵》嘅最高票房動畫電影寶座，路透社重做咗個統計，有七成睇過嘅人話會再睇多次。而我羅拉就是最鍾意套戲入面拎劍嘅型貓，真係抵死到暈呀！