鄭大班暫時封咪，復出無期。佢封咪之後，到歐洲美國行咗一個圈，掛住香港，走返嚟等暑假，到時成家再出外歇暑。知道佢返咗嚟，打電話搵大班，傾吓近況，大班話聽到林旭華在節目與工會領袖對話（名字忘記了），甚有感慨；原來工會領袖話假如電盈出售固網予網通，佢（或者佢哋啲工友）好驚調上大陸，如果去咗烏魯木齊（新疆省會），好唔方便喎。
滙豐銀行有一個傳統，啲「國際人員」（主要係英國人）要全世界去，上頭派你去邊，就要去邊，由香港山頂住宅調到去中東沙漠城市，都要聽命。呢個傳統令到滙豐嘅高層管理人閱歷豐富，視野廣闊。香港本地人現在富裕咗，難捨本地生活，但假如公司需要，派你去新疆，唔去呀，可以嘅，咪辭職去搵工跳槽囉。今日香港塊餅，越來越細，年輕人如果唔抱住北闖打天下嘅思想，好易冇得撈，或者前途有限！
鄭大班喺倫敦見到好多好多不同國籍種族人士，間餐館內，見到十個來自唔同國家嘅侍應，但佢周圍所見（唐人街以外），打工嘅多數係中國大陸內地人、馬來西亞人、印度巴基斯坦人、非洲人、東歐人等等，未見過香港人，吃喝之士（如鄭大班之類嘅遊客）、店舖老闆等就有唔少香港人。香港人與日本人同樣眷戀本土生活，怯於出外奮鬥，似鄭大班年青時跑去加拿大捱世界嘅情況，好唔同咯。