財政司司長唐英年同統戰部女部長劉延東，冇上次同安民擦出火花咁有緣，因為唐唐星期三一大清早會率領一個超過二百人嘅代表團訪問重慶，星期五先至返港，同東東挨身擦過，有份無緣。
唐唐最近先至正式入住新府邸，但係佢周末仍然會返去九龍塘舊宅住，親近吓兩老，真正係兩頭住家。唐唐星期五由重慶返嚟，剛好嗰日政府會公布第一季度本地生產總值，唐唐新聞秘書羅志康話佢老細未必趕及回港解畫，有女強人茅以麗喺度頂住鄧廣堯份經濟顧問嘅差事，唐唐唔使咁趕，至於第一季有冇百分之六嘅增長，羅生話要等周五先知道。
另外，唐唐六月份都好唔得閒，佢六號會同一班港商跟港澳辦公室主任廖暉去東北訪問，地點包括滿洲國舊都長春、瀋陽、大連同埋哈爾濱，到時東北已經回暖，相信唐唐都唔使帶好多厚衣服前往，阿飛話行會內只有五個人想競逐下一屆特首，唔使講，一定有唐少份啦。
傳真︰2623-9278
電郵︰