李美鳳、毛舜筠、郭錦恩、DJ芝See菇Bi、康子妮同林曉峰等，噚日喺黃金海岸出席《瑪花纖體特約：女人心底話》活動，身為代言人嘅李美鳳當然係最性感嘅一個，不過二十五歲嘅芝See菇Bi都唔弱。原來今次李美鳳喺專登返香港出席呢個活動，佢話：「我同瑪花再續多半年約，酬勞方面我都冇乜嘢特別要求。」
問到李美鳳喺新一輯廣告，會唔會比上一輯更加性感，佢話：「我哋好有默契，啲衫我都好滿意，佢哋都唔會有乜性感要求，我本身形象都好高貴、大方。」
而有咗四個月身孕嘅康子妮噚日由老公林曉峰陪同出席活動，佢哋話呢胎都依然係仔。講到曾志偉話希望九月可以做無綫《超級無敵掌門人》，重話林曉峰之前批評無綫制度，所以要雪一雪，如果唔係會發霉，林曉峰話：「佢做凍肉㗎嘛，識得保存新鮮。由頭到尾都冇話我會俾人雪藏。」
何守信（何B）同楊崢等一班《開心大發現》嘅主持噚日齊齊到港台做訪問宣傳節目，何B話個節目有九至十點收視，喺亞視嚟講係一個幾好嘅成績，因為呢個節目係圍繞住家庭生活，比較有親切感。而楊崢都話好開心可以做到呢個節目，楊崢話：「我學到唔少嘢，如果添食就好啦。」
傅珮嘉噚日喺商台做訪問，傅珮嘉話下個月會出新大碟，到時重會有一個以舞台劇形式舉行嘅新碟發布會，所以最近非常緊張，差唔多日日都要排練舞台劇，搞到胸口痛要睇醫生。
傅珮嘉話：「醫生話我輕度胸骨膜發炎，本來叫我照X光，但係我冇時間，惟有頂硬上。」
無綫黃金時段兩線劇集《下一站彩虹》同《翡翠戀曲》上星期大結局，《下》劇雖然贏口碑，但平均收視只有二十九點，即一百九十萬人支持，而由陳慧珊同劉松仁擔演嘅《翡》劇，平均收視亦只有三十點，約一百九十七萬人收看，同《皆大歡喜》扳平，成績普通。
