王從希、薛凱琪及名模Rosemary前晚在數碼港出席新片《明日之後》首映禮，穿上tubetop及短裙的王從希十分搶鏡，她說：「夏天咪着得彩色啲，我唔覺得自己性感。呢排拍緊無綫新劇《灰色軌跡》，我扮律師，係林保怡嘅同事，我覺得角色都好有挑戰性。」
前晚王從希雙眼有點浮腫，似割了雙眼皮，她否認說：「我崇尚自然，只係貼咗膠紙，化咗妝對自己信心大咗，唔使割雙眼皮，我貼膠紙係貪心想深啲。」
此外，薛凱琪日前慶祝唱片大賣，有雜誌指唱片公司高層在祝捷會上替她拿着抹完鼻涕的紙巾，對此薛凱琪說：「其實張紙巾係抹過飛濺出嚟嘅香檳，我冇抹過鼻涕。為咗慶祝好成績，公司墊支一萬蚊畀我買頸鏈同手表做禮物。」