港股噚日表現反覆，曾經微跌過，但午後轉強，結果接近高收，恒指升86點，期指尾段搶升之勢更急，高水18點。大市暫時受制於20日平均線（11673），而250日線（11734）阻力亦唔細，照計回一回再上，會更為有力。
國企個勢就強得多，國指跌穿250日線，只短短3日，又再上番去，重升穿10日線，噚日又衝破埋20日線（4016），高收4088，進帳97點，幅度2.4%。睇噚日個勢，後市重可以看好。第1，國企期指急升166點，由上周五的低水50點，變為高水18點；第2，噚日國企成交32.7億，雖然只係略多過上周五的31.1億，但以比重計，上周五大市成交127億，國企佔24.5%，噚日大市成交108億，國企則佔30.2%，顯示流入國企嘅資金又再增加。國企經呢輪急彈後，噚日獲利回吐嘅壓力唔細，但跌唔落，後市好大機會去到4500先調整。
江西銅（358）愈升愈有，重上3元大關，收3.075元，再升0.25元，由低位2.05元到噚日高位3.1元，升幅51.2%。鋼鐵股亦有好表現，3隻的升幅由3.5%至4.5%不等；由低位起計，馬鋼（323）反彈34.9%、重鋼（1053）37.6%、鞍鋼（347）則有41.9%。金屬股中，反彈得最小係中國鋁業（2600），只得27%，後市有好大機會從後趕上，收復更多失地。
中鋁走勢同國企相似，形成小型頭肩底，噚日升破頸線同20日線，照度上去，上升目標指向5.2元。
中鋁主要生產氧化鋁和原鋁，前者供不應求，後者則係中央宏調重點降溫的對象，但過去一個月，國際鋁價由高位回落16%後，近日已由低位回升，相比高價，調幅只10.6%，公司有信心今年鋁價仍會處於高水平。
中鋁首季氧化鋁產量162萬噸，比去年同期升16.5%，平均售價每噸3584元（人民幣．下同），升46.3%；原鋁銷售15.9萬噸，跌9.4%，售價1.64萬元，升17%。集團持有71.4%權益的山東鋁業，首季獲利2.53億元，大升1.65倍。
中鋁04年盈利仍會有高增長，因應宏調影響，每股盈利由0.63元調低至0.56元，以保守的10倍計（國際同業為20倍），股價已可見5.2元。
郭兆誠