十五歲中一男生偉仔，喺高爾夫球場執波仔，點知就遭到高球好手勁扑一Q，個波篩埋嚟，擊爆一隻眼。
高爾夫球攞命插眼，風險咁高，睇怕都係時候禁止呢隻富豪運動，將高爾夫球列為非法嘞！
點解有咁嘅建議？因為連去長洲搶包山，特區政府都唔准舉行，話個竹棚冧過，因此唔可以合法。民政事務局局長肥平，周末視察長洲，親自督導島民拆棚，話身為政府，有責任保障市民安全。
好嘞，搶包山會攞命，打高爾夫球一樣會一棍畢命，偉仔今次好彩，只係打爆眼球，若然嗰棍上兩吋，一勁波擊中頭殼。高爾夫球危害無辜生命，應該禁絕。
政府會唔會？一定唔會。因為好多高官富豪，都係高爾夫球迷，冇波打，口淡淡，咁大權力兼咁有錢，係好痛苦嘅。
除非肥平、唐唐、煲呔及全港識歎富商等，自己都鍾意玩搶包山，搶開有鋪癮，或者佢哋會知道搶包山好好玩，就唔會禁。
禁得搶包山，就應該禁埋高爾夫球。包山都係一年搶一次咁多，高爾夫球就日日打。搶包山係長洲草根窮人嘅遊戲，與人無尤，不過高爾夫球場出名破壞自然生態，兼生人霸死地，貧富懸殊，會增加社會分化。
民政事務局話：一係就戴鋼盔吊威吔嚟搶包山，若然係咁，有一隻民間技藝叫做高台舞獅，一個失手亦好易撻死，咁係咪應該立例，下令陸智夫、夏國璋等舞獅班，以後入面要戴住個鋼盔，再罩個獅頭，再加綁條威吔，先至准爬高爬低咁呢？
高球執波僮偉仔，都係諗住搵少少外快幫補家計，估唔到一隻眼就咁打爆，一生盲咗半邊，香港嘅窮人真係好慘！執波有幾錢人工一個鐘？執夠三個月，又夠啲高爾夫球手爆幾多支名貴紅酒？高爾夫球唔禁，長洲搶包山就唔准，唔通人窮就賤啲？
又或者，唔禁都得，不過就立例規定，凡執波僮，一定要由高爾夫球會眾多會員嘅仔女或孫仔嚟出任，一來畀啲權貴下一代試吓艱難，二嚟佢哋嘅爹哋阿爺，一棍打埋嚟，都會留吓力，萬一個波飛擊祠堂部位，以後絕埋子孫就損失慘重嘞。
不過，保障市民生命安全點都好重要。肥平鍾意拉小提琴，小提琴嘅琴絃，平時掹到好緊，隨時一斷，就會彈盲一隻眼。或者何局長以後示範吓，戴住個鐵面罩嚟拉小提琴，心情會更加Relax啲，啲音樂會更加動聽啲呢。
傳真︰2623-9278
電郵︰