買家對樓市嘅信心似乎唔係好強，呢排成日聽到有撻定個案，其中重有單連鎖撻定事件㖭。美聯營業經理潘皜民話，早幾日原本有位九龍區嘅換樓客，用三百三十幾萬，買咗間元朗錦綉花園荔枝東路單數屋，一千三百呎，而且落好晒定。
呢位買家係諗住樓換樓，住緊嗰層樓，亦已經賣出兼收埋定金，一心諗住一買一賣啱啱好有錢找數。點知佢賣嘅單位，買家撻定，結果影響咗佢全盤換樓計劃，大失預算之下，買入嘅錦綉花園，都被迫要撻定，足足蝕咗八萬蚊。原本市場應該有兩宗成交，點知一次過全部要撻定。
樓市吹淡風，估唔到可以帶挈買家慳番筆。中原加州錦綉分區經理龍智烽話，元朗加州花園名仕居單號屋，二千零二十一呎，連九百八十呎花園，早前有買家出價六百三十萬洽購，但業主堅持要六百八十萬，惟有放棄。
後嚟市道逆轉，業主見冇人問津，減價三十萬，都無乜反應，中記就搵番之前放棄追價嘅買家，再同業主傾，結果六百一十萬成交，比買家之前嘅出價重平咗二十萬，可以幫補吓添置家具嘅費用。
龍智烽指出，近期市淡，業主嘅議價空間都大咗，幅度有七至十個巴仙。
樓市被利淡消息籠罩，部份買家見狀，選擇撻定離場。好似東涌藍天海岸一座高層E室，七百七十五方呎，連三十一呎露台，業主就俾買家撻定，不過，單位好快再賣出，重多賺兩萬㖭。
美聯物業助理區域經理余柏講，呢個單位喺四月尾，由投資者以二百一十八萬買入，但係十日前就決定撻定，損失十萬走人；業主後嚟再度放盤，一個禮拜內即以二百一十萬成交，但計埋收到殺定嘅十萬，最後重袋多兩萬㖭。
余柏話，呢類單位市場放盤只係得兩個，另一個叫價要二百六十萬。
香港嘅橋樑道路，將會又多一項世界紀錄，就係擁有全球最長嘅斜拉索橋，定名為昂船洲大橋，啱啱批咗畀新昌集團屬下新昌營造廠，同日本前田建設、日立造船同橫河工事株式會社組成嘅聯營公司，合約價值二十七億六千萬，預期○八年六月落成。
香港承建商有分參與興建，可見本港嘅承建技術都有番咁上下。
呢條斜拉索橋六線行車，全長一千五百九十六米，主跨高度達一千零十八米。
啱啱入伙嘅天水圍慧景軒，日前錄得首宗租務成交，租客原來本身都有樓收租。
中原地產分行經理王樹明話，呢名租客之前持有豪宅同舖位，後嚟賣咗住開嘅豪宅，剩番個舖收租。兩夫婦同埋工人，兩年前租住天水圍嘉湖山莊美湖居八百幾呎單位，見慧景軒剛入伙，夠新淨，所以約滿就搬過去，用全包六千蚊租咗二座高層E室，面積九百零二呎，租金比舊租多幾百蚊。
慧景軒業主原先放盤叫租九千蚊，見租客有物業，交租紀錄良好，所以肯收平啲；業主喺舊年沙士期間買入單位，計落回報都有五厘二。
蘭西
電郵地址：
