藍潔瑛噚日喺尖沙嘴為亞視劇集《愛在有情天》宣傳，原本藍潔瑛答應咗會出席戶外宣傳活動，最後佢因為頭痛嚟唔到。
點知去到茶樓做訪問嘅時候藍潔瑛又出現，監製楊紹鴻一見到佢就話：「你今日唔好講無綫過鏡件事！」點知藍潔瑛黑面咁話：「Shutup！」即刻搞到冇人敢出聲。
藍潔瑛成日話好怕傳媒，好似噚日有個男攝影記者影佢側面相，佢就話人想影佢走光相，重鬧到個男記者狗血淋頭，佢話：「唔好咁cheap喇，做男人唔好做個賤男人。」
問到藍潔瑛之前出席無綫直播節目過鏡嘅事，佢話：「講到我好似犯咗彌天大罪，無謂小題大做喇。」
而林建明（大姐明）噚日喺尖沙嘴出席《心晴行動健康講座》時，就話已經了解過藍潔瑛邊笑邊衝過鏡頭單嘢，佢話問番當晚嘅工作人員之後，知道藍潔瑛係因為見到個舊朋友太開心先至會衝過去。
不過大姐明噚日兩次強調已經原諒咗無綫，佢話TVB啲工作人員係要睇實現場情況，既然佢都原諒咗TVB喇，所以TVB都要原諒藍潔瑛喎。
女子組合Twins噚日喺上海出席一個電器產品嘅宣傳，二人一身便服到場，但因為主辦機構安排失誤，令活動足足延遲咗成粒鐘，間接影響咗佢哋嘅訪問都要縮短，加上Twins嘅普通話唔係幾掂，所以結果佢哋草草做完訪問就算，蔡卓妍同鍾欣桐喺訪問時重互讚對方除咗身材好之外，又夠人氣。
韓君婷近日着咗一條吊帶低胸裙出席活動，俾雜誌報道佢「籮霸再現」，韓君婷呢兩日出席電影宣傳，都即刻密實起來，佢話：「纖體公司冇詐我型，我體形都差唔多，可能呢排冇乜嘢新聞。」韓君婷可覺傳媒焦點集中喺佢身體，佢話：「我好似成日冇着衫出街咁，我唔係一個廣告特約藝人，我係一個演員。」
成龍呢排去咗日本宣傳佢嗰套電影《飛龍再生》，喺噚日舉行嘅記招上面，上屆奧運柔道金牌得主田村亮子，突然出現去捧成龍場，佢哋重好似好friend咁㖭。唔單止咁，成龍重出席咗好多個電視節目，好似前晚佢就去咗個由二十一個少女主持嘅深夜節目，重大讚啲女仔整畀佢食嘅定食係極品。
廣州電視台噚晚喺天河體育館搞咗個《2003勁歌王總選頒獎典禮》，今年重舉行埋星光大道，本來班歌手諗住着靚靚去行啦，點知原來條星光大道係化妝間出面條走廊。不過，關心妍都打扮得好性感，佢着住件吊帶bratop，白色短裙，身材睇嚟比平時有睇頭好多，好似食咗豐胸丸咁款。
