寶蓮禪寺噚日舉行浴佛節活動，慶祝佛陀降生二千五百四十八年。特首夫人董趙洪娉同律政司司長梁愛詩應邀做主禮嘉賓。活動開始，按照大會程序，竟然唔係共宣佛號，而係唱「國歌」，同佛家講嘅超脫、自在好唔協調。大會司儀叫全體來賓肅立，點知音響故障，完全無聲，搞到大家擘大個口得個窿。繼而向佛陀行敬禮，諗住音響應該整番，跟住想唱佛寶歌，音響一樣失靈。
至於特首夫人董太喺致辭時話：「今日天氣好好，我唔想大家咁曬，我盡量讀快啲。唔使大家曬得咁辛苦！」寶蓮禪寺監院智慧法師致辭時，就有樣學樣，話為咗慳番啲時間，唔想逐個介紹台上嘅嘉賓，於是只係簡單介紹董太、梁司長等主要嘉賓後，突然江湖黑話衝口而出，話「重有新界嘅龍頭大佬」，即時語驚四座，嘉賓嘩然，搞到坐喺台上嘅嘉賓之一嘅新界鄉議局主席劉皇發面都紅埋。
傳真︰2623-9278
電郵︰