我羅拉唔少friends都有睇過電影《迷失東京》，事後更有唔少人問我關於戲入面標梅利（BillMurray）出席一個日本搞笑電視節目嘅詳情，除咗替俾人糟躓嘅阿標可憐外，重覺得電視節目入面將頭髮同眼眉毛都染成金色嘅主持誇張又變態。
唔知大家知唔知，其實呢個所謂《Matthew'sBestHitTV》嘅節目，係真係存在㗎。主持藤井隆都唔知紅咗幾多年，觀眾就係鍾意睇佢「乸乸哋」，而上得去嘅嘉賓都知佢一定會糟躓人，所以唔單止樂在其中，而且重一於你癲時我更喪咁話。
就好似嚟緊嘅幾集，松田聖子、竹內結子同加藤愛呢幾個形象斯文嘅女星，都俾藤井激到標眼水。自言好崇拜聖子嘅藤井，將聖子過往經典嘅造型極盡醜化，但聖子只係笑到唔識鬧佢。
而藤井喺玩遊戲前更加揸住加藤愛條頸話：「你要望住我，我先講到個玩法畀你知！」而竹內結子同藤井玩扮貓運波時，藤井突然獸性大發咬住個波唔放，同樣嚇死人。所以話如果戲中嘅標梅利明白呢啲日本遊戲，只要唔介懷就enjoy到㗎啦！