港股連跌兩個半月後，上周終於有強力反彈，且初露轉機，中期調整浪底或已出現。
恒指上周一大跌309點，低見10917後回升，周三同周五分別大升397同236點，彈力比預期為強，全周收11576，升299點，比低位則升658點，走勢已突破小型頭肩底的頸線，及由4月初開始形成的下降楔形阻力，前者的量度上升目標係12000，後者則顯示調整有機會已完成。未來的個多月，恒指會在12000至11000內橫行，營造底部，下半年再起升浪，目標將指向16000至18000。
國企股跌得急，確係博反彈的最佳對象，由低位起計，好多都升番30%至50%，真係有「危」才有「機」；彈得最勁係鎮海煉化（1128），由低價4.45元升上6.7元，升幅50.5%，其他如江西銅（358）同兗煤（1171），升幅都有41.4%同36.5%。
國指上周五收3990，全周升243點，已重上250日線（3854）之上，比上周一的低位3502升番488點，由於反彈個勢太急，短期會在4000水平整固，基金狂掃咗幾日後，買盤亦可能收一收，若果都跌唔落，後市就有好大機會向4500的三角形底部推進。
個別二三線股（交投活躍者計）嘅反彈，力度同幅度，都唔比國企遜色，好似世紀城市（355），由0.51元彈上0.87元，幅度70%，華人置業（127）同低位比較升55.5%，俊和（711）同富豪酒店（078）亦分別有48%同44%進帳，呢啲係較突出嗰幾隻，好多二三線股重未正式起步，博反彈，重有大把機會。
文化傳信（343）由低位0.365元升上0.415元，只係反彈13.7%，重等緊機會發力。文傳由高位0.72元回落，幅度唔細，若反彈跌幅的0.382，都可以上番0.5元水平。文傳走勢形成下降楔形，家吓已升番上10日線，若衝破0.425元呢個20日線，同楔形嘅阻力，則中期上升大浪就會展開。
今年2月，短短半個月內，文傳股價由0.32元升上0.64元，大升1倍；今次若破位，升幅亦可能會好急。文傳畢竟係一家大翻身的公司，現時都只係起步階段，前景可以寄予厚望。
郭兆誠