兩三個月前開始，美元兌外幣一輪急升；個幾星期開始，美元弱番少少。若然認為美元短期內會繼續偏弱，可以諗吓揸啲滙價輪。
（1）買澳美滙價Call輪9280（美元跌，澳元升，則隻輪升），7月到期，輪價18.1仙，上周五溢價2.4%，槓桿率30倍。
（2）買英美滙價Call輪9628（美元跌，英鎊升，則隻輪升），8月到期，輪價10.5仙，上周五溢價6%，槓桿率132倍。
（3）買歐美滙價Call輪9622（美元跌，歐元升，則隻輪升），8月到期，輪價9.3仙，上周五溢價8%，槓桿率100.8倍。
（4）買美日滙價Put輪9856（美元跌，日圓升，則隻輪升），11月到期，輪價9.5仙，上周五溢價10.1%，槓桿率82.1倍。
滙價輪波幅驚人，因為槓桿率勁大。只要美元滙價變動1%，滙價輪分分鐘上落20-30%，而美元滙價變動1%，可能只係半晝時間。
重有，炒滙價輪，坐盤坐得太耐，可以輸得好勁，因為溢價一定會收縮。例如上便所提歐美滙價Call輪9622，假如兩個月後，歐元兌美元滙價同𠵱家一樣，隻輪溢價（現時8%）到時縮剩1-2%，則輪價亦會剩得非常有限。
美元呢幾日回軟，對美股同港股都係好事。炒輪，暫時咪搞恒指、藍籌、中企Put輪，有機會揸佢哋嘅Call輪較上算。
章盛