上周港股回升，市場信心好番啲。不過經紀黃話，部份基金贖回情況仍未改善，導致多隻二三線股仍被拋售，令股價跌至唔合理嘅水平，先思行（595）亦係呢個原因令股價積弱。
先思行喺年初，因為持有嘅MP3生產商Reigncom在韓國上市，股價受惠大升，由1元水平起步，炒到上去最高1.96元，股價炒上嘅主要動力，當然係芬佬睇中買入。
近期大市氣氛轉淡，芬佬亦局住沽貨，先思行股價因此回落，好似上周五咁，逆市跌咗9%，收1.01元，幾乎回到未升前嘅水平，雖然成交量唔大，只得120萬股，金額130萬元，但就見到幾間大行掛牌沽。
經紀黃又話，先思行基本因素應該冇大變，佢揸住12.4%嘅Reigncom仍然好值錢，至於其他生意如電子零件製造同分銷，有分析員估計今年會復甦。先思行似乎跌得過份，但可惜因為芬佬仍然沽緊貨，所以就算有唔少證券行努力推介，股價都係唔多掂。
慕容小初