意大利方面近日盛傳AC米蘭有意斟日本國寶中田英壽過檔。一聽呢個消息，球迷應明白AC醉翁之意不在酒，最需要並非「壽仔」嘅球技，而係佢喺亞洲嘅宣傳價值。據聞「壽仔」為咗盡快離開缺財嘅帕爾馬，不惜自動減薪、做「人肉宣傳品」都唔拘喎。
我求大俠記得一年前AC已經試過同中田嘅經理人交涉，不過傾唔掂數。今時唔同往日，「壽仔」沉咗一排後，講價能力自然打個折扣，而佢為咗搵頭好住家，據聞唔介意將佢大約三百萬歐元（約二千八百萬港元）年薪降價益AC，減幅幾多就唔知啦。
雖然AC中場人手爆晒棚，攻有卡卡、雷哥斯達；守就更加多悍將，但勝在角逐賽事多，「壽仔」總有用武之地；最重要係大樹好遮陰，唔使擔心錢財。AC擺明想用佢攻亞洲市場，不過就算佢閃電加盟，都因為養緊傷未必東來比賽啦。
中超聯球證執法水準持續有爭議，上海國際慘被誤判十二碼而被北京現代迫和，當日已引起球迷哄動，而且傳出球證與旁證判決不一致，引起國際高層決定向中國足協上訴。其實，呢場比賽澳彩亦有開盤，結果因呢個問題球，由開上盤變下盤，判決咁敏感，真係好難唔令人懷疑喎！
唔少球迷對曼城嘅法國前鋒安歷卡嘅兩個阿哥嘅印象，係覺得佢哋係搞風搞雨嘅足球員經紀。不過，安歷卡其中一個大佬哥迪，最近就以三十二萬鎊（約四百四十八萬港元）入股蘇格蘭甲組拉夫流浪，過班主癮，而佢更一口氣幫球隊簽咗七個法國球員㖭！
摩連奴帶領波圖成績好，令多間球會想搵佢，英超車路士就係佢最可能落腳地方。不過，佢成為另一英超球隊利物浦領隊嘅賠率，日前落飛變成三點二五倍大熱。計我求大俠話，佢去車仔機會點都高啲，因利記點都唔夠車仔有錢，又有啲必唔可以賣嘅球員，領隊嘅發揮空間有限。
有美國「足球神童」之稱嘅艾度，十四歲就踢職業隊的確厲害。唔好以為佢咁就荒廢學業，其實佢讀書都唔錯，重喺上星期五獲佛州嘅艾迪遜學院頒發高校文憑。既然艾度正式中學畢業，我求大俠就希望佢可以喺華盛頓聯隊踢好波，因為華盛頓喺今屆美國大聯盟只係贏過兩場咋！