參選最重要喺撲水，搞一個選舉工程，分分鐘多達幾百萬。民協噚晚搞籌款晚宴，雖然因為「封咪」事件，請唔到名嘴李鵬飛和黃毓民，好彩土產「三大護法」，余若薇、梁家傑和湯家驊肯出馬幫民協籌款。民協副主席廖成利，笑到見牙唔見眼咁告訴八方，肯定可以達到五十萬嘅籌款目標，比去年多梗一截。
民協噚晚係喺尖沙嘴海洋皇宮搞晚宴，三位護法都好落力籌錢，湯家驊同梁家傑就合唱一曲，歌神許冠傑的《鐵塔凌雲》。佢哋話，呢首歌係點畀大班和毓民聽，希望佢哋都會留意到歌詞啦！
最後在三位熱心擁躉支持下，三套馮檢基、廖成利同嚴天生嘅Q版公仔，其中一套拍賣咗兩萬蚊，另外兩套賣咗五千，民協今鋪真係賺唔少，相信就算多幾塊banner俾人𠝹，民協都蝕得起。
民協近排都好黑仔，街板成日被人𠝹爛，馮檢基又收到恐嚇信，唔知會唔會有土共趁機混入晚宴，買個馮檢基公仔落降頭？
傳真︰2623-9278
電郵︰