精明消費:性感女神廁紙筒全港至索

精明消費:性感女神廁紙筒全港至索

人要衣裝,想不到連廁紙都要玩包裝,說的是套住廁紙的廁紙筒。市面廁紙筒的設計層出不窮,有玩嘢搞鬼的,又有簡潔大方的,平價貴價悉隨尊便,最緊要襯番屋企裝修。當中以本地創作的Mary公仔最令人感到驚喜,有咗佢,你會發現拉廁紙都會變得有新意!

記者:梁彩燕 攝影:陳陶鈞

筒裝設計靈活隨處放
廁紙向上拉,慳位唔會嘥!不要以為廁紙筒的款式來來去去都是一個普通膠筒,多啲留意的話,你會發現原來重有好多玩設計的款式,既實用又搞鬼,重可以作為家居擺設的一部份!

ThisMarySoFunny
各位觀眾,呢位眼大大嘅美女叫Mary,身高約26cm,剪有一頭時下最In嘅劉海及擁有豐滿身材。廁紙由圓圓的嘴部拉出,全個都係本地設計,黃色毛毛上衣更可以除出嚟,內裏有咩乾坤?自己睇啦!
售價:$98(i)

Cute版機械人頭
機械人畀人感覺好Cool,但當佢變身成為廁紙筒之後就溫柔得多,有黑色、白色、紅色同橙黃色選擇,兩邊耳仔重可以調校廁紙長度,好方便!
售價:$288(d)

小心家有惡犬
既是廁紙筒又可以任你攬,有黑色或白色皮革質地,抓毛質料就有黑色、白色同卡奇色,狗仔長約40cm,攬住好舒服。
原價:$160 特價:$128(b)

日日過中秋
唔係端午節先可以食糭嘅,所以都唔係中秋節先可以掛燈籠囉!但咪以為呢個真係燈籠喎,唔燒得㗎!佢係一個陶製嘅廁紙筒,放邊度都咁有節日氣氛。
售價:$90(a)

勁吹60年代風
五、六十年代懷舊風勁吹,廁紙筒亦可以湊熱鬧!這個令人眼花撩亂的波波圖案,有紅色和藍色任揀,型仔一族不能錯過。
售價:$65(a)

愛花首選
今年勁Hit花花Pattern,無論碎花抑或大大朵紅花都咁受追捧。呢個廁紙筒,在白色的陶瓷上,繪有一朵大紅花,清雅脫俗!
售價:$380(g)

型格十足夠簡潔
不銹鋼上蓋配陶瓷盒身,唔會生銹又容易清潔,簡約得來型格十足,年輕一派最鍾意。
售價:$138(c)



掛牆式簡潔大方
洗手間內的廁紙架,通常係入牆式或者用螺絲裝上支架。掛牆的廁紙架大多以設計簡單為主,以下款式睇吓有無啱心水之作!

回歸自然
驟眼看還以為是木材製造的廁紙筒,問真啲才知佢係用出名堅硬嘅樹脂膠製成,表面的金色漆油唔會脫色,外觀又有回歸自然的感覺。
售價:$530(g)

無面鐵頭公
不銹鋼廚具大家就用得多,有冇諗過不銹鋼都可以用嚟做廁紙筒?嚴格嚟講佢只係一個廁紙笠,因為完全冇底部承托,方唔方便就自己諗喇!
售價:$250(a)



平價貨十蚊有找
若然大家認為廁紙筒最緊要實用,在雜貨舖又或平價家品店內,你會發現唔使十蚊都可以買到得意廁紙筒。

水晶頭夠名貴
呢個金銀色的廁紙架,金色部份係電鍍24K金,頂部則選用SWAROVSKI水晶,顯得份外矜貴。
原價:$1,550特價:$1,085(f)

磨砂蓋顯品味
西班牙入口的ROCA廁紙架,正宗係來路貨。磨砂玻璃上蓋少見得來又夠In,配襯埋鐵柄設計,盡顯個人品味。
原價:$1,600 特價:$1,280(e)

方便就手
向外設計的廁紙架夠晒細心,可方便大家拉廁紙。磨砂上蓋易清潔,外表簡約又不失美觀。
原價:$1,100 特價:$880(e)



售賣點
(a)G.O.D 28905555
(b)tintplus 31043107
(c)Francfranc 31068958
(d)mumamuba 29150006
(e)colour.living 22956881
(f)HappyFace 29235090
(g)崇光百貨 28338338
(h)白馬平價店 61514144
(i)Choice 23428923

得意雞仔
論平價廁紙筒,呢個破蛋雞仔款可謂最煞食,鮮黃色筒身夠搶眼,造型得意,一定受小朋友歡迎。
售價:$6(h)

大方平實
橢圓形大大個,平實中帶點花款,配襯一室簡潔家具,都可給人優雅之感。
售價:$7(h)

奸人哈哈笑
小丑帶畀人歡樂,但係呢個就有啲反常,你話佢係忠定奸?
售價:$6(h)