一直以嚟，有機舖搵錢王之稱嘅射擊Game，到今時今日已不復當年勇。就算喺家用機上亦少見新作登場。最出名只有推出已大半年嘅《R．TypeFinal》，令到一眾射擊迷十分期待另一經典《GRADIUS》嘅新作，急不及待一試突破傳統嘅自編武器系統。香港KONAMI更安排《蘋果日報》記者率先試玩內部開發版本。今日就為大家搶先預報呢款七月推出嘅PS2大作。
記者：徐影龍
鳴謝：KONAMI（HK）
遊戲類型：射擊
對應機種：PS2
遊玩人數：1至2人
發售日：7月22日
開發商：KONAMI
以往港人稱為《宇宙巡航艦》嘅《GRADIUS》系列，由紅白機、GameBoy、超任等平台，不知不覺原來已推出超過二十幾個版本，引伸出嚟嘅《沙羅曼蛇》、《沙鍋曼蛇》等系列一樣大受歡迎。
憑藉香港KONAMI之助，有幸率先試玩開發版本之《GRADIUSV》，須動用到極為機密嘅「TEST」版PS2開發機，比一般試玩用嘅Debug機更為罕有。雖然官方一直有開放Demo版本畀各方人士試玩，不過今次筆者玩到之版本，比日本店頭試玩，甚至E32004嘅版本更為齊料。不但Loop1全八關自由任玩，就連爆機後嘅Loop2特別關數亦玩到。基本上已屬未出街嘅完全版。首先發覺官方公布儲存媒體雖為CD-ROM，不過玩到嘅開發版卻是DVD-R，未知正式推出後會否改動。
觀看完一輪令人歎為觀止既開場動畫後，便正式進入遊戲模式選擇畫面。除單打、雙打、Option、Config、Save/Load等幾個例牌菜外，較令人注意只有一個「ScoreAttack」模式，亦即以「貪分」為目標嘅玩法。新意欠奉，不過相信跟開啟某些隱藏元素有關。
筆者選擇由第一關開始遊戲，3D畫面靚到無話可說，雖然背景全部為太空，不過構圖意念相當新鮮。太陽黑子群、衞星軌道、隕石群等特色關卡，全部都同玩者有互動關係。如推進某類隕石為自己擋火柱、射爆小型星體開路等。玩起上嚟相當之刺激。
《GRADIUSV》最突破一點，就係設有武器自編系統，過往玩家操控嘅戰機VicViper，通常只有四種武器進化選擇，是但揀一樣。不過當爆機一次後，喺武器選擇系統上按「L」或「R」掣，就會出現另一個武器選擇畫面，入面有齊歷代出現過嘅各式武器，而且導彈、雷射、分身（Option）等均可獨立選擇，玩家大可按喜好編入唔同嘅武器，成為有個人特色嘅VicViper。
另一變更點，就係分身運用變得更有戰略性，喺舊作，分身只會跟隨戰機而活動，不過今集卻可按下「R」掣，強制固定分身位置，利用呢個特性，大可派分身狂射首領弱點，自機則專心回避敵方攻擊，好有《R．Type》Feel。
雖然《GRADIUS》出名難玩，不過筆者每次都熟記每關要點，敵人分布等攻略要點，苦練一輪下仍可爆機。不過嚟到《GRADIUSV》，首一、二關尚算簡單，不過打後難度提升得好厲害。唔止敵人瘋狂掃射，連舞台設計都充滿撞機陷阱。基本上喪失所有武器進化後，好難再打落去，絕對係「一隻」過關嘅高手遊戲。尤其係第二循環嘅Loop2。不但嘍囉變得更兇，就連首領級敵人外形及攻擊招數都有所變化。不過挑戰性及耐玩度肯定更高，值得期待。
