長洲太平清醮係咪復辦搶包山，官民兩方呢排拳來腳往。康文署施展卸字訣，話請教過專業人士，建包山要有認可人士計吓啲竹架係咪承托得起啲大漢。估唔到太平清醮籌備委員會真係搵到個認可人士出嚟，計條數話用竹棚搭包山冇問題。
呢一招搞到政府倒瀉籮蟹，發晒茅話一定要用鋼架搭包山先安全，最多畀你哋插啲竹係側邊充撐吓。咁樣大石砸死蟹，激到班委員即刻搵班老師傅搭個棚架，搵埋傳媒嚟見證個包山點掂。
官民鬧到咁都唔知點收科，點知噚日阿頭民政事務局局長何志平紆尊降貴，同籌委會一齊入長洲視察個包山。何局長一句話竹棚唔安全，不如我哋明年先全力協助；籌委會即刻收晒火，重話自己暫時未夠班搞，自行擱置舉辦。何局長一出手就擺平長洲班鄉紳，究竟私底下同佢哋講乜，令佢哋收晒火？八方諗極都諗唔明。
（圖）何局長噚日親自視察包山，重擺平咗班長洲鄉紳。
傳真︰2623-9278
電郵︰