下月滿二十四歲的K歌王后容祖兒，雖曾學鄭秀文和楊千嬅作歌影發展，祖兒卻表示每次拍戲都令她很痛苦，因她習慣大聲講對白，故拍完戲便會聲沙一個月，得不償失，所以她寧願專心唱歌，死守其K歌王后寶座。
容祖兒天生一把好嗓子，她坦言自己唱得唔演得，曾演出電影《大贏家》、《魂魄唔齊》及《蘋果咬一口》的祖兒，日前在尖沙嘴接受本報訪問，談到自己的演技時說：「唔好，同專業好有距離。上天可以畀條好聲帶我，但做戲就要再睇吓點，順其自然，自己再慢慢累積經驗啦，公司都怕咗我，佢哋見到我拍戲個樣好痛苦，拍一部戲我會聲沙成個月，因為拍戲時不知不覺會好大聲，到頭來影響好大，得不償失。」
唱歌出身的鄭秀文（Sammi）及楊千嬅皆因為拍戲而將事業推向另一層次，既然珠玉在前，祖兒沒有電影的助力，單靠唱歌發圍，演藝路途可能較為難行，祖兒對此說：「我唔覺得喎，每樣嘢都有好同唔好，我可以專心唱歌，每個人嘅方式唔同，娛樂圈冇方程式，你哋覺得係嘅嘢又未必係，唔係一本通書讀到老嘅。」
雖然Sammi及千嬅在拍戲上勝過祖兒，但祖兒近年在歌唱事業方面卻比兩人佔優，其歌曲在卡拉OK更所向披靡，祖兒說：「就算叻都係喺香港呢一個地方，世界咁大，比我叻嘅人太多。雖然我對自己嘅成績非常滿意，但人大咗就有好多嘢要學識進步。」
祖兒續說：「我唔需要去諗自己好過邊啲人，只要做到最叻嗰頭三個就夠，每年啲人又會比較吓，良性競爭係好事。」下個月才滿二十四歲的祖兒，年前已在跑馬地山村台自置物業，又擁三部座駕，這位K歌王后雖有名有利，不過卻嫌身家未夠勁。祖兒說：「名利好虛幻嘅，我未有安全感，唔係真實嘅嘢，我都重未可以令到媽咪非常安樂咁過埋下半世，未夠勁呀！」那怎樣才算勁？她想了一想說：「總之重要儲多啲錢，畀媽咪可以舒舒服服，大家睇落就叫名成利就，收入好似好多，但我支出亦好多。」
祖兒坦言每月花得最多的是置裝，她說：「我碌卡嘅，每個月係媽咪同我找數，買衫係最大支出，要成六位數字一個月，因為真係有需要，其他嘅嘢就拉上補下，平日出街啲衫，我已經好少買，着嘅都係幾年前嘅舊衫，我屋企嘅睡衣係《太陽計劃》T恤，我喺食方面又好簡單，每晚都盡量返屋企食飯，等媽咪煮齋畀我食，日頭就通常喺髮型屋叫外賣，食碗湯米，都係十零二十蚊一餐，我又要喼弗，唔敢食太多。」
採訪：朱倬誼
攝影：何國豪
場地：帝苑酒店
部份服裝提供：I.T
