噚日八方講過金管局總裁任志剛，今日上港台《與CEO對話》嘅內容，其實任總嘅訪問講咗好多鮮為人知嘅事。佢喺金融界最敬重嘅人係美國聯儲局主席格林斯潘。佢話格老好多分析都好複雜，但佢可以講得清清楚楚。雖然清楚，但要跟着佢嘅思路好唔容易。
任總舉咗一個例子，有次格老叫人聽清楚：「我知道你相信、你明白、你認為我說的是甚麼，但我不能肯定你了解和聽到的，是否我所表達的真意」。任總讚格老可以將咁複雜嘅思維，輕而易舉便說出來，所以每次格老演講，佢會細看稿子，逐字斟酌。
訪問任總，自然會提到九七年金融風暴，同埋九八年入市打大鱷。任總話絕對唔介意九七年時，因將隔夜息夾到二百厘，而俾人叫佢做「任一招」，因為可以令人明白金管局能夠做嘅嘢有限。
到咗九八年，金融大鱷又嚟香港搵錢，任總話自己一直諗，點樣可以令炒家賺唔到錢，甚至輸錢離場，而毋須令利率飆升。任總話，入市買港股係佢喺某個周末，瞓喺床上諗出嚟。佢之後打電話畀律師，問佢外滙基金條例，係咪容許咁做，律師話可以。翌日，任總搵當時財政司司長曾蔭權同財經事務局局長許仕仁，經過曾司長短時間嘅考慮就決定出招。
（圖）任志剛話入市買港股擊退大鱷呢條橋係佢諗出嚟嘅。 資料圖片
傳真︰2623-9278
電郵︰