早排菊川怜主演套劇《通靈巴士導遊事件簿》發生撞鬼事件，話有逾百觀眾睇電視時，見到有隻男鬼企喺佢背後，雖然事後菊川怜都話只係菲林問題，但已經令膽小嘅羅拉心驚驚。但估唔到連客串該劇嘅上戶彩都好惹鬼，前日有報紙就搵咗個日本有名嘅通靈師，指出彩妹喺劇入面一場回憶嘅戲份，招咗三隻被處決嘅惡鬼出嚟！
個通靈師重講到似層層，畫咗幅圖出嚟講明佢見到嘅三個亡靈嘅樣同位置。首先場戲係講彩妹同菊川，上山搵一個失蹤十年嘅少女，彩妹突然感應到個女仔存在，於是大叫咗一聲，個女仔就立即出現眼前，之但係個畫面同時多咗三個人頭！
通靈師話，呢個場地應該係古代嘅一個處決場，喺棵樹上高嘅係一個三十歲嘅武士，樹中間嘅就係佢嘅部下，佢哋兩個一齊身中多槍而死，怨氣好重。尤其最高嗰隻，佢好惡咁望住攝影隊，好似喺度話：「你哋班人嘈醒咗我！」而企喺少女後面嘅一隻只係隻普通嘅遊魂，冇乜殺傷力喎！
不過各位彩妹或者菊川嘅fans唔使咁驚住，聽講呢幾隻鬼嘅惡意唔係向佢哋而嚟，而只係拍攝隊中有人同鬼魂嘅腦電波相符。再講，鬼神呢，話到尾都係不信則無。