祖兒在單親家庭長大，與母親的感情十分深厚，她表示很想母親拍拖，卻不贊成她再婚，祖兒說：「以我所知佢冇男朋友，但我好想佢有，我唔贊成佢再婚，因為佢冇諗過。佢好鍾意飲茶，一有時間我就會陪佢飲茶，而佢𠵱家學緊瑜伽，識多好多嘢。結唔結婚唔代表啲乜，媽咪唔鍾意俾人綁住，佢鍾意照顧我哋。」
祖兒坦言沒有與父親聯絡，她笑說：「我上一次見佢係睇報紙，佢上自我增值課程唱《我的驕傲》吖嘛，幾好笑，但我諗自己都係適合唱母親節嘅歌多啲，佢呀？一個爸爸囉，始終因為佢而令媽咪好傷心，呢啲唔係一種好好嘅感覺。」
祖兒愈說愈感觸：「𠵱家我二十四歲，媽咪以前喺我呢個年紀時，已經要抱住我，餵我食奶、換尿片，完全冇咗自己，我因為佢至有𠵱家多姿多彩嘅生活同呢份工作，所以我會畀心機，希望自己快啲冇咁忙。」
祖兒與英皇簽了十年長約，再過五年，賣身契便屆滿，她到時就可以好好陪伴母親，問祖兒約滿英皇後會否退出娛圈？她即笑說：「我要睇到時個樣殘唔殘，OK就再繼續做，唔係就唔好阻住人哋。」