組合Twins的鍾欣桐（阿嬌）和蔡卓妍昨日到荃灣出席活動，阿嬌緋聞男友陳冠希（Edison）的時裝店日前開幕，他表示任何人都不會有折扣，阿嬌表示不知情並呻窮。
女子組合Twins、何韻詩和劉浩龍昨日到荃灣愉景新城，出席「愛心純棉日」慈善滙演。Twins除了擔任表演嘉賓外，更向現場觀眾大派棉花，吸引大批小朋友一擁而上圍在台邊。
當Twins在後台拍照時，有一位貌似陳冠希（Edison）的小孩上前要求合照，事後問阿嬌有否留意該「小Edison」時？她竟笑說：「我唔覺佢似Edison喎，反而我覺得佢似《鬼妻》個女主角。」
對於Edison的時裝店開幕，阿嬌表示不知情，她說：「我都係睇報紙先知咋，所以我冇去過，我𠵱家要供樓呀，好少去買衫啦。」當記者告知二人Edison指任何人都不會獲得折扣時，蔡卓妍（阿Sa）說：「唓，我好不滿呀！我哋去邊都有折扣，同佢相識一場都冇。」
而何韻詩昨日透露獲名牌Dior贊助，她於周四更要到北京擔任由Dior舉行的派對的表演嘉賓，她說：「自從阿姐（梅艷芳）走咗之後，佢哋都想繼續做贊助，可能佢哋覺得我性格適合啦，星期四我去表演時要着一件露好多肉、好lady嘅裙，所以我都要收一收身。」
此外，劉浩龍因為即將推出個人大碟而感到有無形壓力，所以近日不停以食減壓，他說：「我一返到屋企就坐低攞嘢食同飲汽水，加上我阿媽又成日炒好大碟叉燒炒飯同煲湯畀我，所以我都怕自己會一路肥落去。」
採訪：李珮洳 攝影：陳偉權
