「六四」十五周年就快到，支聯會噚日搞咗個「中台港澳兩岸四地民主互動」研討會，講番「六四」當年種種血淚，當年一班香港學生領袖到𠵱家都重淚盈於睫。席間何俊仁又講番佢哋點幫留喺北京嘅港人同記者撤走。當年係李柱銘搵當時嘅港龍老細之一蘇海文（包玉剛女婿），叫佢班部飛機上北京救人，蘇海文幾個鐘搞掂，但就輪到馬丁擔心自己無錢找數，好彩蘇海文話只收成本價十幾萬，但到第二日行政、立法兩局開會，又有人「玩嘢」，一時話搵英航，一時又話搵國泰，搞到馬丁又要搵當時布政司霍德，由大頭Ford擺平。
何俊仁又話，佢哋後來為救喺北京被扣嘅李卓人，衝去港督府搵當時嘅「督爺」衛奕信講數，要佢拍電報去英國求救至肯走，但到衛奕信叫佢哋幫手勸督府門口集會嘅人走時，輪到佢哋話無能為力！華叔話嗰時港英真係如臨大敵，政治部重諗住保護佢，怕佢俾人捉，佢一口拒絕，對方唔知係幽默定嚇佢話：「咁你唔好行咁近海邊！」
傳真︰2623-9278
電郵︰