名嘴封咪事件續有餘震，被鄭大班謔稱鄭小班嘅民主黨立法會議員鄭家富，今日下午三點喺旺角行人專用區搞個「封咪裡的茶杯」論壇，同市民討論封咪事件，企出嚟講嘢嘅包括鄭大班個拍檔林旭華、立法會保安事務委員會主席涂謹申，鄭小班話好意外有位稀客現身，就係身兼立法會議員嘅人大代表馬逢國。
鄭小班話上星期同馬逢國喺立法會吹水想搞個論壇，馬逢國一聽到就話有興趣參加，鄭小班提醒佢呢個論壇由民主黨搞，人大捧場隨時俾人施壓喎，點知馬人大拍心口話冇有怕，遂成為首個參加民主黨街頭活動嘅人大代表。馬逢國今次咁勇，有人估計同左派要搵機會企出嚟為阿爺消毒有關，表明名嘴封咪唔關阿爺事，馬逢國今日點講，如何應付市民質詢，要聽過先知嘞。
傳真︰2623-9278
電郵︰