王菲前晚喺上海虹口足球場舉行《菲比尋常》演唱會，雖然成晚落住雨，但依然有過萬fans捧場，加上今次個唱最貴要一千八百蚊人民幣（約一千七百港元）一張飛，班fans自然希望王菲唱多幾首，可惜王菲唱咗二十九首歌之後就鬆人，無論fans點樣嗌encore佢都唔理，搞到班fans好鬼冇癮，更一度鼓譟。
咁啱得咁蹺，前晚有自稱現場觀眾打電話嚟香港報館報料，一時話王菲演唱會因為落大雨突然腰斬，一時又話佢喺舞台撻低受傷所以腰斬，但馮仁昭同上海老友了解過後，發現所有傳聞都係流料，估計可能有fans不滿王菲唱完就走人唔肯encore，所以打電話整蠱佢。
不過，王菲前晚的確因為天雨路滑而跣一跣腳，而佢喺台上用普通話講：「今天又下雨了，希望你們過得開心。」成晚講唔夠十句說話，令人覺得佢相當cool。
前晚記者收到風話舒淇同朋友喺中環Zense餐廳搞派對，去到現場等到凌晨十二點幾，見到張達明同個女仔離開，之後見到陳欣健，到凌晨三點幾就見到趙金卿，原來係趙金卿舉行生日派對，見佢飲咗幾多酒要人扶，而呢個時候竟見到霍震霆個仔霍啓剛搭𨋢上樓，唔知佢去邊呢？
陳秀雯同馬景濤以前曾傳不和，但呢排佢哋成日一齊宣傳亞視新劇《愛在有情天》，重懶老友咁。前晚佢哋去新城做訪問，影影吓相，馬景濤突然拖住陳秀雯隻手，陳秀雯話：「我哋拍戲時成日拖手㗎啦，拖住都幾有安全感。」噚日佢哋又去鑽石山做宣傳，玩遊戲時陳秀雯差啲錫咗馬景濤個嘴，好彩只係掂到面。佢兩個由仇人變老友，唔知幾成真呢？
2R同李逸朗（Don）噚日出席銅鑼灣一個商場活動，合照時記者笑緋聞情侶、2R成員Race同Don，Race即刻取笑話：「佢𠵱家同Kary啦！」Don即尷尬否認話：「冇呀！冇拍拖呀！」2R嘅細妹，近排嚟咗香港，重被記者影到，2R話：「細妹俾人追到入大廈，嚇到喊！如果再有記者入大廈就報警。」
張學友去咗馬來西亞宣傳新碟，噚日就開咗個簽名會，但無喇喇俾記者問幾時退休，學友就話覺得退休等於退化，所以永不言休，佢重講咗個故事：「有個人已經一百零一歲，重係每日返工，我爸爸五十幾歲就退休，𠵱家啱啱過七十，身體好差，我覺得冇嘢做係原因之一。」馮仁昭唔明點解啲人鍾意問做緊嘢嘅人幾時退休，又問退咗休嘅人幾時復出？
以薛家燕（好姨）肖像造成嘅人形毛絨公仔噚日推出，好姨重喺尖沙嘴ColorRich專門店舉行簽名會，而佢啲fans就一早每人攬住個毛公仔排隊，好姨話嚟緊會推出百幾二百款用佢肖像造成嘅產品，呢啲產品重會推銷到世界各地，好姨淨係抽佣條數都有排計。
梁思浩噚日出席中港城舉行嘅活動，提起近期啲名嘴封咪，佢話自己喺個節目度都會間中講吓政治，佢話唔一定係政府畀壓力，做商營電台最怕冇廣告，開咪得罪啲高官，最怕都係佢哋有好多做生意嘅親朋戚友，唔落廣告嚟制裁番你。
