小小超李澤楷收購「東方燃氣」後，一直都未改名，聞說曾經考慮過叫「盈科發展」，但嫌太過普通。八方最近收到料，個中文名已經拍板，叫做「盈科大衍」。呢個名係由幾個好有中文修養嘅高人度出嚟。
八方查古籍，大衍呢個名出自《易經》之《繫辭傳》，所謂「大衍之數五十，其用四十有九」，篇文係教人點樣占卜，最後得出一個卦象，然後再利用卦象解釋疑問，所以呢種占卜法又叫大衍法。至於個衍字，中國權威文字學書籍《說文解字》記載，衍乃「水朝宗于海」，即水滴不斷積聚，滙流成為大海。另一個解釋更加煞食，喺小爾雅入面話：「澤之廣者為之衍」。呢個澤字，當然係澤楷個澤，而衍字，就代表小小超嘅生意不斷發展。夾成咁，小小超當然拍板通過呢個名。
對一般市民，就艱深咗些少，簡單咁講，衍即衍生咁解，全個名即係話盈科大搞地產嘅意思。至於公司嘅簡稱，叫做「盈大」，點都好過「盈fall」。
傳真︰2623-9278
電郵︰