李超人講和黃（013）3G前景，和黃有反應，一升就係4.3%，跑贏大市。恒指彈升236點，和黃「居功」29點。
和黃Call輪9058，上咗龍虎榜，收8.6仙，飛升100%。隻輪7月初夠鐘，溢價9.5%，槓桿率59.3倍。但唔係所有和黃Call輪都生生猛猛，隻9857只升1仙咁大把，收50仙，大概因為溢價唔低（前日18.2%）。不過經過昨日嘅變化之後，若然繼續睇好和黃，買9857比較實際，隻輪明年2月到期，溢價已收窄到13.5%，槓桿率10.2倍。另一隻和黃Call輪9766，亦係熱門貨，收30.5仙，升幅43%，10月到期，溢價13.8%，槓桿率16.7倍。9857冇乜點升到，拍埋去，又係相對抵買。
和黃Call輪9058升100%，只能喺龍虎榜上做阿4，做阿1嘅係新世界Call輪9297，由實際作廢價1仙飛上6.3仙，升幅530%，以前唔知有冇窩輪試過1日彈升5倍幾。新世界（017）周一見底後，氣勢如虹，昨日收5.75元，再升7.5%。正股早前供股，隻輪行使價調整到6.88元，溢價20.6%，槓桿率100.6倍。隻輪全日成交金額唔夠一萬銀，睇好正股嘅話，買正股比較實際。
龍虎榜阿2係華創Call輪9131，升124%，收18.4仙，7月初到期，溢價13.1%，槓桿率48.4倍。槓桿率好爆炸，但溢價唔得吸引。
章盛