大市噚日又急彈，好多之前跌過龍嘅股票都玩大反撲，唔單止優質股反彈，連細價股都大幅炒上。
其中波鞋股新怡環球（1094）急升16.2%，收0.136元，成交股數1.08億股，金額1402萬元。睇成交相當夠氣勢，唔多似乾炒。
不過，經紀陳問小初，家陣波鞋股好環境咩？如果係嘅話，又唔見裕元（551）同信星（1170）股價有表現？
經紀陳話聽到個古仔，新怡早排2供3，每股0.10元，供股集資6180萬元，但供股只獲33.3%認購，幾個供股包銷商結果要硬啃其餘認購不足嘅數額，聽講呢手貨佔新怡已擴大股本四成咁多，重多過大股東的29.37%，咪話唔驚人。
既然有人揸重咗，自然要諗辦法甩身，如果唔將股價炒高，斷估都唔會有人肯跟進。據講由於早排跌市，所以成班炒家一直按兵不動，直至近兩日市況好番多少，就拿拿臨開車炒上。
經紀陳又話，如果小初自問身手好轉身快，或者可以玩一轉，但走唔切就分分鐘接火棒。
慕容小初