蔣怡昨日一身性感打扮與任達華到深圳，為一間新會所任開幕嘉賓。因現場安排混亂，保安又坐視不理，蔣怡慘被大班所謂工作人員圍着合照，為免有碰撞或發生抽水事件，任達華即充當臨時保安護花。
蔣怡（CoCo）昨日與任達華到深圳出席思妍麗心居會所開幕禮，CoCo穿着運動型bratop及長裙出現，有型又性感。
當儀式未開始前，CoCo與華仔在台下等候期間，大班疑是影迷的工作人員一同圍着二人要求合照，情況顯得混亂，旁邊保安坐視不理，又未有公關作出適當安排。CoCo被人圍得花容失色，一臉尷尬，幸好有華仔在旁充當保安護花，以防發生碰撞或抽水事件。
後來華仔都忍不住問：「乜冇公關安排吓嘅？」連會所老闆都說：「啲公關去咗邊？點解重未開始？」到一輪勁歌熱舞後，儀式終於開始，二人剪綵後，CoCo換上三點色泳衣浸spa，十分搶鏡。
CoCo接受訪問說：「好彩華仔喺度，佢好有風度幫我，唔係我實好驚。今次酬勞好好，會所重畀我一年免費嚟玩，好似去咗泰國咁舒服，我每年都去一次resort度假㗎。」問CoCo是否曬得太陽多以致膚色略黑，她笑說：「唔知，可能天生，我又真係易曬黑，公司話咁樣少咗好多job，好彩佢哋冇叫我漂白，我係冇護膚品廣告啫，但都有贊助呀。」
華仔則表示他獲一世免費會籍，似乎該會所有大細超之嫌。華仔又說：「難得有咁多影迷想影相，冇所謂啦。」
華仔透露稍後將拍攝葉偉信執導的新戲，與洪金寶及甄子丹合作，年底他又要到美國參與一部愛情動作片的演出，他說：「我同甄子丹以前合作過啦，係袁和平執導嘅《特警屠龍》，我好鍾意同勁人合作，可以迫到自己打得好啲。」
採訪、攝影：MaggieFung
