加拿大Rock女AvrilLavigne，最近為配合新碟《UnderMySkin》宣傳，喺世界各地唔同嘅商場搞個唱，佢啱啱去咗東京宣傳，重喺台場嘅VenusFort教會廣場開騷，在場二千fans都俾佢搞到癲晒。
AvrilLavigne呢排喺日本好勁，喺東京間間唱片舖都播住佢喺嗰邊率先推出嘅新碟，而張唱片喺日本嘅出貨量已經接近一百萬張，亦打低地頭龍宇多田光同hitomi，登上今個星期嘅Oricon大碟榜冠軍，唔怪得知Avril去到日本嗰陣心情勁靚，喺台場開騷嗰陣唔止以招牌黑色背心仔打扮出現，重喺右手臂上寫住「日本最高」，即係日本最刺激咁解，擺明就係𠱁日本fans啦。
一向好rock嘅Avril當日雖然只係同結他手齊齊揸住支木結他喺台上自彈自唱玩unplugged，但以佢響亮嘅歌聲唱起《TakeMeAway》同《Don'tTellMe》等新歌嗰陣一樣rock得起，搞到全場瘋狂起舞，地震咁滯。尤其係佢唱代表作《Complicated》嗰陣全場fans情緒高漲，更加有年輕女fans俾人迫到頂唔順，喊住咁要叫保安帶佢離場。而AvrilLavigne唔似BritneySpears咁咪嘴搵人笨，全場使出真功夫，最後亦講句日文「ARIGATO」多謝fans，重向台下掟結他pick，等瘋狂fans爭餐飽。
完場之後，有唔少fans即刻走到場外攤位買Avril新碟，又即時申請加入fanclub，佢咁樣谷碟真係使得。而Avril喺本地走勢唔弱，佢張新碟雖然後日先推出，但定單已超過白金數量。
記者張一明東京直擊
